ek KHwab-e-raegan ko sajaane nikal gaye

ik ḳhvāb-e-rā.egāñ ko sajāne nikal gaye

ham bhī havā pe naqsh banāne nikal gaye

āñkhoñ ke aa.ine meñ likhī thiiñ udāsiyāñ

ham muskurā ke un ko chhupāne nikal gaye

dīvār-e-dil pe us kā jo saaya sā naqsh thā

ham ḳhūn-e-dil se naqsh miTāne nikal gaye

is dil kī tishnagī kā bhalā kyā 'ilāj ho

ham āñsuoñ se pyaas bujhāne nikal gaye

jab koī rāz-dāñ na milā shahr-e-dard meñ

ham pattharoñ ko dard sunāne nikal gaye

ḳhvāboñ kī vādiyoñ meñ thī ik ḳhalq be-ḳhabar

ham shor kar ke sab ko jagāne nikal gaye

'ādat sī 'qais' ho ga.ī ham ko bhī 'ishq kī

ham apnī kā.enāt luTāne nikal gaye

ek KHwab-e-raegan ko sajaane nikal gaye

hum bhi hawa pe naqsh banane nikal gaye

aankhon ke aaine mein likhi thin udasiyan

hum muskura ke un ko chhupane nikal gaye

diwar-e-dil pe us ka jo saya sa naqsh tha

hum KHun-e-dil se naqsh miTane nikal gaye

is dil ki tishnagi ka bhala kya 'ilaj ho

hum aansuon se pyas bujhane nikal gaye

jab koi raaz-dan na mila shahr-e-dard mein

hum pattharon ko dard sunane nikal gaye

KHwabon ki wadiyon mein thi ek KHalq be-KHabar

hum shor kar ke sab ko jagane nikal gaye

'adat si 'qais' ho gai hum ko bhi 'ishq ki

hum apni kaenat luTane nikal gaye