hum us basti mein aksar aaine le kar nikalte hain

ham us bastī meñ aksar aa.ine le kar nikalte haiñ

ki tah-dar-tah zamīnoñ se jahāñ patthar nikalte haiñ

añdheroñ ko hiqārat kī nazar se dekhne vaalo

añdheroñ se hamesha sub.h ke manzar nikalte haiñ

hameñ mā'lūm hai kab lau bhaḌaktī hai charāġhoñ kī

hameñ mā'lūm hai kab chyūñTiyoñ ke par nikalte haiñ

ghuTan mahsūs karte haiñ mire jazbāt jab mujh meñ

ġhazal ban kar hisār-e-jism se bāhar nikalte haiñ

hunar-mandī kā dā'vā mat karo 'sāhil' ki duniyā meñ

jinheñ kuchh bhī nahīñ aatā vo sab kuchh kar nikalte haiñ

hum us basti mein aksar aaine le kar nikalte hain

ki tah-dar-tah zaminon se jahan patthar nikalte hain

andheron ko hiqarat ki nazar se dekhne walo

andheron se hamesha subh ke manzar nikalte hain

hamein ma'lum hai kab lau bhaDakti hai charaghon ki

hamein ma'lum hai kab chyunTiyon ke par nikalte hain

ghuTan mahsus karte hain mere jazbaat jab mujh mein

ghazal ban kar hisar-e-jism se bahar nikalte hain

hunar-mandi ka da'wa mat karo 'sahil' ki duniya mein

jinhen kuchh bhi nahin aata wo sab kuchh kar nikalte hain