gulsitan mein zaKHm-e-ulfat se koi Khaali na tha

gulsitāñ meñ zaḳhm-e-ulfat se koī ḳhālī na thā

ḳhushbuoñ ke tiir the bād-e-sabā kā siina thā

mujh ko apnī zaat ke TukḌe nazar aate rahe

anjuman meñ har koī TuuTā huā ā.īna thā

sohbat-e-nā-jins meñ le kar phireñ jins-e-girāñ

ahl-e-dil kā roz-e-avval se yahī rozīna thā

ab to ik muddat se us kī diid bhī baaqī nahīñ

vo hasīñ manzar ki jis ko dekhnā kaafī na thā

luT gayā sau baar lab tak aate aate har suḳhan

varna jab dil se chalā thā ik 'ajab ganjīna thā

gulsitan mein zaKHm-e-ulfat se koi KHali na tha

KHushbuon ke tir the baad-e-saba ka sina tha

mujh ko apni zat ke TukDe nazar aate rahe

anjuman mein har koi TuTa hua aaina tha

sohbat-e-na-jins mein le kar phiren jins-e-giran

ahl-e-dil ka roz-e-awwal se yahi rozina tha

ab to ek muddat se us ki did bhi baqi nahin

wo hasin manzar ki jis ko dekhna kafi na tha

luT gaya sau bar lab tak aate aate har suKHan

warna jab dil se chala tha ek 'ajab ganjina tha