dil ki taraf hijab-e-takalluf uTha ke dekh

dil kī taraf hijāb-e-takalluf uThā ke dekh

ā.īna dekh aur zarā muskurā ke dekh

is daur meñ ye tarz-e-jafā aazmā ke dekh

dil ke bajā.e dil ke sukūñ ko miTā ke dekh

taslīm kī nazar se karishme razā ke dekh

begāngi-e-dost ko apnā banā ke dekh

is shorish-e-hayāt ko had se baḌhā ke dekh

ye fitna aur hashr se pahle uThā ke dekh

yuuñ dekhtā hai tīrgī-e-āb-o-gil meñ kyā

sholoñ se khel dil ko jalā aur jalā ke dekh

har zindagī kā naam na rakh dil kī zindagī

īmān zindagī pe na lā aazmā ke dekh

terī tajalliyoñ se kisī tarah kam nahīñ

dil kī tajalliyoñ ko kabhī dil meñ aa ke dekh

ab ke adā-e-ḳhās se kar imtihān-e-dil

jo barq tuur par na girī ho girā ke dekh

haañ ahl-e-dil ke haal se ġhaflat muhāl hai

achchhā yaqīñ nahīñ to mujhī ko bhulā ke dekh

duniyā ko dekhnā to mayassar nahīñ tujhe

zarre ko dekhnā hai to duniyā banā ke dekh

'fānī' safīna ab bhī na Duube to kyā kare

tūfān ko na dekh sitam nā-ḳhudā ke dekh

dil ki taraf hijab-e-takalluf uTha ke dekh

aaina dekh aur zara muskura ke dekh

is daur mein ye tarz-e-jafa aazma ke dekh

dil ke bajae dil ke sukun ko miTa ke dekh

taslim ki nazar se karishme raza ke dekh

begangi-e-dost ko apna bana ke dekh

is shorish-e-hayat ko had se baDha ke dekh

ye fitna aur hashr se pahle uTha ke dekh

yun dekhta hai tirgi-e-ab-o-gil mein kya

sholon se khel dil ko jala aur jala ke dekh

har zindagi ka nam na rakh dil ki zindagi

iman zindagi pe na la aazma ke dekh

teri tajalliyon se kisi tarah kam nahin

dil ki tajalliyon ko kabhi dil mein aa ke dekh

ab ke ada-e-KHas se kar imtihan-e-dil

jo barq tur par na giri ho gira ke dekh

han ahl-e-dil ke haal se ghaflat muhaal hai

achchha yaqin nahin to mujhi ko bhula ke dekh

duniya ko dekhna to mayassar nahin tujhe

zarre ko dekhna hai to duniya bana ke dekh

'fani' safina ab bhi na Dube to kya kare

tufan ko na dekh sitam na-KHuda ke dekh