ابھی سے لائے ہو کیوں دل کی راہ پر اس کو

ابھی سے لائے ہو کیوں دل کی راہ پر اس کو

بھٹکنے دینا تھا کچھ دن ادھر ادھر اس کو

وہ مشت خاک کہ اڑنے سے آشنا ہی نہ تھی

لگا دیے ہیں تمنا نے بال و پر اس کو

نہ جانے کب وہ مجھے چھوڑ کر چلا جائے

میں زندگی کی طرح کر چکا بسر اس کو

اس اختصار کی تفصیل کون دیکھے گا

بکھر گیا ہوں میں کتنا سمیٹ کر اس کو

نہ خواب ہی سے جگایا نہ انتظار کیا

ہم اس دفعہ بھی چلے آئے چوم کر اس کو

وہ جس کا نام بھی سننا ہمیں پسند نہ تھا

کیا ہے روز کے جھگڑوں نے معتبر اس کو

چلا گیا تھا وو کشتی میں بیٹھ کر تابشؔ

ہوا ہے شہر میں کیا اس کی کیا خبر اس کو