ab parindon ki yahan naql-e-makani kam hai

ab parindoñ kī yahāñ naql-e-makānī kam hai

ham haiñ jis jhiil pe us jhiil meñ paanī kam hai

ye jo maiñ bhāgtā huuñ vaqt se aage aage

merī vahshat ke mutābiq ye ravānī kam hai

de mujhe anjum-o-mahtāb se aage kī ḳhabar

mujh se faanī ke liye ālam-e-fānī kam hai

ġham kī talḳhī mujhe nashsha nahīñ hone detī

ye ġhalat hai ki tirī chiiz purānī kam hai

ġhaib ke baaġh kā vo bhed khulā hai mujh par

jis kā iblāġh parindoñ kī zabānī kam hai

hijr ko hausla aur vasl ko fursat darkār

ik mohabbat ke liye ek javānī kam hai

itnā mushkil to na thā gum-shudagāñ kā milnā

ham ne ai dasht tirī ḳhaak hī chhānī kam hai

is samay maut kī ḳhushbū ke muqābil 'tābish'

kisī āñgan meñ khilī rāt-kī-rānī kam hai

ab parindon ki yahan naql-e-makani kam hai

hum hain jis jhil pe us jhil mein pani kam hai

ye jo main bhagta hun waqt se aage aage

meri wahshat ke mutabiq ye rawani kam hai

de mujhe anjum-o-mahtab se aage ki KHabar

mujh se fani ke liye aalam-e-fani kam hai

gham ki talKHi mujhe nashsha nahin hone deti

ye ghalat hai ki teri chiz purani kam hai

ghaib ke bagh ka wo bhed khula hai mujh par

jis ka iblagh parindon ki zabani kam hai

hijr ko hausla aur wasl ko fursat darkar

ek mohabbat ke liye ek jawani kam hai

itna mushkil to na tha gum-shudagan ka milna

hum ne ai dasht teri KHak hi chhani kam hai

is samay maut ki KHushbu ke muqabil 'tabish'

kisi aangan mein khili raat-ki-rani kam hai