ab kya bataun main tere milne se kya mila

ab kyā batā.ūñ maiñ tire milne se kyā milā

irfān-e-ġham huā mujhe apnā patā milā

jab duur tak na koī faqīr-āshnā milā

terā niyāz-mand tire dar se jā milā

manzil milī murād milī mudda.ā milā

sab kuchh mujhe milā jo tirā naqsh-e-pā milā

ḳhud-bīn-o-ḳhud-shanās milā ḳhud-numā milā

insāñ ke bhes meñ mujhe aksar ḳhudā milā

sargashta-e-jamāl kī hairāniyāñ na pūchh

har zarre ke hijāb meñ ik aa.ina milā

paayā tujhe hudūd-e-ta.ayyun se māvarā

manzil se kuchh nikal ke tirā rāsta milā

kyuuñ ye ḳhudā ke DhūñDne vaale haiñ nā-murād

guzrā maiñ jab hudūd-e-ḳhudī se ḳhudā milā

ye ek hī to ne.amat-e-insāñ-navāz thī

dil mujh ko mill gayā to ḳhudā.ī ko kyā milā

yā zaḳhm-e-dil ko chhīl ke siine se pheñk de

yā e'tirāf kar ki nishān-e-vafā milā

'sīmāb' ko shagufta na dekhā tamām umr

kam-baḳht jab milā hameñ ġham-āshnā milā

ab kya bataun main tere milne se kya mila

irfan-e-gham hua mujhe apna pata mila

jab dur tak na koi faqir-ashna mila

tera niyaz-mand tere dar se ja mila

manzil mili murad mili muddaa mila

sab kuchh mujhe mila jo tera naqsh-e-pa mila

KHud-bin-o-KHud-shanas mila KHud-numa mila

insan ke bhes mein mujhe aksar KHuda mila

sargashta-e-jamal ki hairaniyan na puchh

har zarre ke hijab mein ek aaina mila

paya tujhe hudud-e-tayyun se mawara

manzil se kuchh nikal ke tera rasta mila

kyun ye KHuda ke DhunDne wale hain na-murad

guzra main jab hudud-e-KHudi se KHuda mila

ye ek hi to neamat-e-insan-nawaz thi

dil mujh ko mill gaya to KHudai ko kya mila

ya zaKHm-e-dil ko chhil ke sine se phenk de

ya e'tiraf kar ki nishan-e-wafa mila

'simab' ko shagufta na dekha tamam umr

kam-baKHt jab mila hamein gham-ashna mila