ab ki chaman mein gul ka ne nam o ne nishan hai

ab kī chaman meñ gul kā ne naam o ne nishāñ hai

fariyād-e-bulbulāñ hai yā shohra-e-ḳhizāñ hai

ham sair kar jo dekhā rū-e-zamīñ ke uupar

āsūdgī kahāñ hai jab tak ye āsmāñ hai

ham kyā kaheñ zabāñ se aap hī tū sun rahegā

shikva tire sitam kā zālim jahāñ tahāñ hai

muddat huī ki mar kar maiñ ḳhaak ho gayā huuñ

jiine kā bad-gumāñ ko ab tak mire gumāñ hai

holī ke ab bahāne chhiḌkā hai rañg kis ne

nām-e-ḳhudā tujh uupar is aan ajab samāñ hai

makre se fā.eda kyā rindoñ se kab chhupī hai

kyā hājat-e-bayāñ hai jo kuchh hai sab ayaañ hai

rañg-e-gulāl muñh par aisā bahār de hai

juuñ āftāb-e-tābāñ zer-e-shafaq nihāñ hai

kesar meñ is tarah se ālūda hai sarāpā

sunte the ham so dekhā to shāḳh-e-za.afarāñ hai

aap hī meñ dekh 'hātim' vahdat ke biich kasrat

tū ek o ek jā hai aur dil kahāñ kahāñ hai

ab ki chaman mein gul ka ne nam o ne nishan hai

fariyaad-e-bulbulan hai ya shohra-e-KHizan hai

hum sair kar jo dekha ru-e-zamin ke upar

aasudgi kahan hai jab tak ye aasman hai

hum kya kahen zaban se aap hi tu sun rahega

shikwa tere sitam ka zalim jahan tahan hai

muddat hui ki mar kar main KHak ho gaya hun

jine ka bad-guman ko ab tak mere guman hai

holi ke ab bahane chhiDka hai rang kis ne

nam-e-KHuda tujh upar is aan ajab saman hai

makre se faeda kya rindon se kab chhupi hai

kya hajat-e-bayan hai jo kuchh hai sab ayan hai

rang-e-gulal munh par aisa bahaar de hai

jun aaftab-e-taban zer-e-shafaq nihan hai

kesar mein is tarah se aaluda hai sarapa

sunte the hum so dekha to shaKH-e-zafaran hai

aap hi mein dekh 'hatim' wahdat ke bich kasrat

tu ek o ek ja hai aur dil kahan kahan hai