ab kaho karwan kidhar ko chale

ab kaho kārvāñ kidhar ko chale

rāste kho ga.e charāg jale

āñsuoñ meñ nahā ga.iiñ ḳhushiyāñ

ruuTh kar jab vo aa lage haiñ gale

ishq ġham ko ubuur kar na sakā

rāste kārvāñ ke saath chale

ham pe guzrī haiñ hijr kī rāteñ

ham jahannam meñ the magar na jale

the mohabbat kī ibtidā ke qusūr

vo tabassum jo āñsuoñ meñ Dhale

ḳhaak se saiñkaḌoñ uge ḳhurshīd

hai añdherā magar charāg-tale

chāñd sākit hai ruk ga.e taare

ab vo aa.eñ to ġham kī raat Dhale

mai-kade kā to zikr bhī hai gunāh

ab hayāt-e-haram paḌī hai gale

pursish-e-hāl kā javāb thā kyā

hañs paḌe ham ki jald baat Tale

ab kaho karwan kidhar ko chale

raste kho gae charag jale

aansuon mein naha gain KHushiyan

ruTh kar jab wo aa lage hain gale

ishq gham ko ubur kar na saka

raste karwan ke sath chale

hum pe guzri hain hijr ki raaten

hum jahannam mein the magar na jale

the mohabbat ki ibtida ke qusur

wo tabassum jo aansuon mein Dhale

KHak se sainkaDon uge KHurshid

hai andhera magar charag-tale

chand sakit hai ruk gae tare

ab wo aaen to gham ki raat Dhale

mai-kade ka to zikr bhi hai gunah

ab hayat-e-haram paDi hai gale

pursish-e-haal ka jawab tha kya

hans paDe hum ki jald baat Tale