fikr ke zahrab mein ras gholiye tasir ka

fikr ke zahrāb meñ ras gholiye tāsīr kā

dard kab muhtāj hotā hai kisī tafsīr kā

ḳhaak se aflāk tak mahdūd āzādī milī

paaoñ meñ halqa rahā imkān kī zanjīr kā

āḳhir-e-shab ḳhvāb kā gulshan sunahrā ho gayā

sub.h kī Daalī pe ġhuncha khil gayā tā'bīr kā

saat rangoñ meñ bikhar kar rah gayā ek ek naqsh

Dhal rahā thā zehn meñ ḳhāka tirī tasvīr kā

ruuh kyā tā'mīr hogī jism kī taḳhrīb se

sang kaj rakkhā hai tū ne shahr kī tā'mīr kā

fāsloñ kī gard bikhrī manziloñ kī raah meñ

sar meñ rah jaa.e na saudā dahr kī tasḳhīr kā

paikar-e-dānā.ī bhī naḳhchīr-e-nā-dānī rahā

log kahte haiñ ki 'ġhālib' mo'taqid thā 'mīr' kā

fikr ke zahrab mein ras gholiye tasir ka

dard kab muhtaj hota hai kisi tafsir ka

KHak se aflak tak mahdud aazadi mili

paon mein halqa raha imkan ki zanjir ka

aaKHir-e-shab KHwab ka gulshan sunahra ho gaya

subh ki Dali pe ghuncha khil gaya ta'bir ka

sat rangon mein bikhar kar rah gaya ek ek naqsh

Dhal raha tha zehn mein KHaka teri taswir ka

ruh kya ta'mir hogi jism ki taKHrib se

sang kaj rakkha hai tu ne shahr ki ta'mir ka

faslon ki gard bikhri manzilon ki rah mein

sar mein rah jae na sauda dahr ki tasKHir ka

paikar-e-danai bhi naKHchir-e-na-dani raha

log kahte hain ki 'ghaalib' mo'taqid tha 'mir' ka