aarzu wasl ki rakhti hai pareshan kya kya

aarzū vasl kī rakhtī hai pareshāñ kyā kyā

kyā batā.ūñ ki mire dil meñ haiñ armāñ kyā kyā

ġham azīzoñ kā hasīnoñ kī judā.ī dekhī

dekheñ dikhlā.e abhī gardish-e-daurāñ kyā kyā

un kī ḳhushbū hai fazāoñ meñ pareshāñ har sū

naaz kartī hai havā-e-chamanistāñ kyā kyā

dasht-e-ġhurbat meñ rulāte haiñ hameñ yaad aa kar

ai vatan tere gul o sumbul o raihāñ kyā kyā

ab vo bāteñ na vo rāteñ na mulāqāteñ haiñ

mahfileñ ḳhvāb kī sūrat huiiñ vīrāñ kyā kyā

hai bahār-e-gul-o-lāla mire ashkoñ kī numūd

merī āñkhoñ ne khilā.e haiñ gulistāñ kyā kyā

hai karam un ke sitam kā ki karam bhī hai sitam

shikve sun sun ke vo hote haiñ pashemāñ kyā kyā

gesū bikhre haiñ mire dosh pe kaise kaise

merī āñkhoñ meñ haiñ ābād shabistāñ kyā kyā

vaqt-e-imdād hai ai himmat-e-gustāḳhi-e-shauq

shauq-añgez haiñ un ke lab-e-ḳhandāñ kyā kyā

sair-e-gul bhī hai hameñ bā.is-e-vahshat 'aḳhtar'

un kī ulfat meñ hue chaak garebāñ kyā kyā

aarzu wasl ki rakhti hai pareshan kya kya

kya bataun ki mere dil mein hain arman kya kya

gham azizon ka hasinon ki judai dekhi

dekhen dikhlae abhi gardish-e-dauran kya kya

un ki KHushbu hai fazaon mein pareshan har su

naz karti hai hawa-e-chamanistan kya kya

dasht-e-ghurbat mein rulate hain hamein yaad aa kar

ai watan tere gul o sumbul o raihan kya kya

ab wo baaten na wo raaten na mulaqaten hain

mahfilen KHwab ki surat huin viran kya kya

hai bahaar-e-gul-o-lala mere ashkon ki numud

meri aankhon ne khilae hain gulistan kya kya

hai karam un ke sitam ka ki karam bhi hai sitam

shikwe sun sun ke wo hote hain pasheman kya kya

gesu bikhre hain mere dosh pe kaise kaise

meri aankhon mein hain aabaad shabistan kya kya

waqt-e-imdad hai ai himmat-e-gustaKHi-e-shauq

shauq-angez hain un ke lab-e-KHandan kya kya

sair-e-gul bhi hai hamein bais-e-wahshat 'aKHtar'

un ki ulfat mein hue chaak gareban kya kya