rida-e-mai mein nihan misl-e-rang-e-mina hun

ridā-e-mai meñ nihāñ misl-e-rang-e-mīnā huuñ

maiñ terā aa.ina ban kar ḳhud apnā parda huuñ

tirī nazar kī kam-āmeziyoñ se nikhrā huuñ

maiñ tishnagī ke nashe se bhī jhuum uThtā huuñ

kidhar ko le ke chale guftugū ke moḌ mujhe

maiñ tere qurb meñ bhī dūriyoñ se Dartā huuñ

tilism-e-shauq se niklūñ to phir batā.ūñgā

tirī talab kā saman-zār huuñ ki sahrā huuñ

sunī hai har jaras-e-ġhuncha se tirī āvāz

talāsh-e-gauhar-e-ḳhushbū meñ jab bhī niklā huuñ

tirī ziyā se jalātā huuñ mash'al-e-mahtāb

maiñ jab zamān-o-makāñ saath le ke chaltā huuñ

na-jāne kaun sī shab terā naqsh-e-pā chamkā.e

har ek shaam tarab-zār-e-dil sajātā huuñ

fazā meñ jo tirī tasvīr ban ke phailā thā

sukūt-e-shab meñ vahī giit ban ke gūñjā huuñ

banā gayā tire dāman ko jo ridā-e-sahar

fazā-e-shauq kā vo Dūbtā sitārā huuñ

maiñ aaj toḌ ke zanjīr-e-ārzū 'sādiq'

sabā ke saath kahīñ duur jaane vaalā huuñ

rida-e-mai mein nihan misl-e-rang-e-mina hun

main tera aaina ban kar KHud apna parda hun

teri nazar ki kam-ameziyon se nikhra hun

main tishnagi ke nashe se bhi jhum uThta hun

kidhar ko le ke chale guftugu ke moD mujhe

main tere qurb mein bhi duriyon se Darta hun

tilism-e-shauq se niklun to phir bataunga

teri talab ka saman-zar hun ki sahra hun

suni hai har jaras-e-ghuncha se teri aawaz

talash-e-gauhar-e-KHushbu mein jab bhi nikla hun

teri ziya se jalata hun mash'al-e-mahtab

main jab zaman-o-makan sath le ke chalta hun

na-jaane kaun si shab tera naqsh-e-pa chamkae

har ek sham tarab-zar-e-dil sajata hun

faza mein jo teri taswir ban ke phaila tha

sukut-e-shab mein wahi git ban ke gunja hun

bana gaya tere daman ko jo rida-e-sahar

faza-e-shauq ka wo Dubta sitara hun

main aaj toD ke zanjir-e-arzu 'sadiq'

saba ke sath kahin dur jaane wala hun