muzhda-e-manzil-e-shab aabla-pa tak pahunche

muzhda-e-manzil-e-shab ābla-pā tak pahuñche

baat dil kī jo ḳham-e-zulf-e-rasā tak pahuñche

zarā zindāñ bhī chalā aa.e barā.e majnūñ

ye darīcha bhī kabhī mauj-e-sabā tak pahuñche

phir to anjām mohabbat kā ḳhudā hī jaane

merī gustāḳhī agar chashm-e-hayā tak pahuñche

mirī aahoñ kī nihāyat tire ījāb-o-qubūl

lab kī jumbish mire us dil kī sadā tak pahuñche

raat bhar jaage sitāre tirī ġhammāzī meñ

ye tunuk-zarfī mah-e-nāsiya-sā tak pahuñche

ab kyā ummīd kareñ sāz-e-tarab-nāk se ham

ġham ke paiġhām dil-e-naġhma-sarā tak pahuñche

āsmānoñ kī taraf dekhtī hai pyāsī zamīñ

ye qayāmat tire gesū kī ghaTā tak pahuñche

lab-e-mahtāb ne jumbish to zarā kī bhī nahīñ

gosh-e-anjum suḳhan-e-be-sar-o-pā tak pahuñche

muzhda-e-manzil-e-shab aabla-pa tak pahunche

baat dil ki jo KHam-e-zulf-e-rasa tak pahunche

zara zindan bhi chala aae barae majnun

ye daricha bhi kabhi mauj-e-saba tak pahunche

phir to anjam mohabbat ka KHuda hi jaane

meri gustaKHi agar chashm-e-haya tak pahunche

meri aahon ki nihayat tere ijab-o-qubul

lab ki jumbish mere us dil ki sada tak pahunche

raat bhar jage sitare teri ghammazi mein

ye tunuk-zarfi mah-e-nasiya-sa tak pahunche

ab kya ummid karen saz-e-tarab-nak se hum

gham ke paigham dil-e-naghma-sara tak pahunche

aasmanon ki taraf dekhti hai pyasi zamin

ye qayamat tere gesu ki ghaTa tak pahunche

lab-e-mahtab ne jumbish to zara ki bhi nahin

gosh-e-anjum suKHan-e-be-sar-o-pa tak pahunche