maqtal se rah-o-rasm-e-takalluf uThai jae

maqtal se rāh-o-rasm-e-takalluf uThā.ī jaa.e

ḳhud un kī āstīn unheñ ab dikhā.ī jaa.e

jab bārish-e-karam nahīñ maqsūm-e-ārzū

ḳhvāboñ kī ḳhushk fasl hī yaaro ugaa.ī jaa.e

e'lān shahr-e-dil meñ huā hai ye raat bhar

ab sub.h ko bhī sham' na ġham kī bujhā.ī jaa.e

jiddat-parastoñ se kaho tāqoñ meñ gul jalā.eñ

aur ho sake to sham' chaman meñ ugaa.ī jaa.e

āñkhoñ meñ sharm palkoñ pe ehsās kī namī

ab vaqt hai jabīn-e-mohabbat jhukā.ī jaa.e

ādāb kuchh 'ajab haiñ mohabbat ke dosto

jo chiiz jis ne dī ho usī se chhupā.ī jaa.e

kyuuñ ḳhālī haath aa.ī hai us kūche se sabā

kyā guzrī gesuoñ pe ḳhabar to mañgā.ī jaa.e

tūfāñ meñ raushnī ke ye āñkheñ hī bujh na jaa.eñ

ik rāh-e-tīra shahr se haT kar banā.ī jaa.e

āvāz duuñ kisī ko to maiñ kyā samajh ke duuñ

khiḌkī kisī makāñ kī khulī bhī to paa.ī jaa.e

vā'da kiyā hai us ne 'na.īmī' ba-sad karam

ik sham' aaj bazm-e-surayyā se laa.ī jaa.e

maqtal se rah-o-rasm-e-takalluf uThai jae

KHud un ki aastin unhen ab dikhai jae

jab barish-e-karam nahin maqsum-e-arzu

KHwabon ki KHushk fasl hi yaro ugai jae

e'lan shahr-e-dil mein hua hai ye raat bhar

ab subh ko bhi sham' na gham ki bujhai jae

jiddat-paraston se kaho taqon mein gul jalaen

aur ho sake to sham' chaman mein ugai jae

aankhon mein sharm palkon pe ehsas ki nami

ab waqt hai jabin-e-mohabbat jhukai jae

aadab kuchh 'ajab hain mohabbat ke dosto

jo chiz jis ne di ho usi se chhupai jae

kyun KHali hath aai hai us kuche se saba

kya guzri gesuon pe KHabar to mangai jae

tufan mein raushni ke ye aankhen hi bujh na jaen

ek rah-e-tira shahr se haT kar banai jae

aawaz dun kisi ko to main kya samajh ke dun

khiDki kisi makan ki khuli bhi to pai jae

wa'da kiya hai us ne 'naimi' ba-sad karam

ek sham' aaj bazm-e-surayya se lai jae