har guzarta shaKHs gham-aluda hai
har guzartā shaḳhs ġham-ālūda hai
vo galī kitnī sitam-ālūda hai
lutf-e-yaktā.ī hai shab bhar aur phir
saa.e se apne sanam ālūda hai
sabt hai māthe pe zaḳhm-e-ārzū
andhe sajdoñ se haram ālūda hai
kyā uThā.eñ kachchī ummīdoñ pe ghar
husn kī dīvār nam-ālūda hai
aañkh meñ aisā chubhā manzar koī
aaj tak aahū ye ram-ālūda hai
kaun aage kaun pīchhe rah gayā
vasvasoñ meñ har qadam ālūda hai
kātib-e-tahrīr-e-haq kaisā hai 'aun'
ḳhuun se jis kā qalam ālūda hai
har guzarta shaKHs gham-aluda hai
wo gali kitni sitam-aluda hai
lutf-e-yaktai hai shab bhar aur phir
sae se apne sanam aaluda hai
sabt hai mathe pe zaKHm-e-arzu
andhe sajdon se haram aaluda hai
kya uThaen kachchi ummidon pe ghar
husn ki diwar nam-aluda hai
aankh mein aisa chubha manzar koi
aaj tak aahu ye ram-aluda hai
kaun aage kaun pichhe rah gaya
waswason mein har qadam aaluda hai
katib-e-tahrir-e-haq kaisa hai 'aun'
KHun se jis ka qalam aaluda hai
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
