baam-e-KHurshid se raaton ko sada di jae

bām-e-ḳhurshīd se rātoñ ko sadā dī jaa.e

aur har raushnī us ghar kī bujhā dī jaa.e

kab se behosh paḌī hai mire qadmoñ meñ hayāt

tū kahe to tirī zulfoñ kī havā dī jaa.e

chāñd bhī lījiye vīrān sā sahrā niklā

ab tumheñ chāñd se tashbīh bhī kyā dī jaa.e

shukriya mashvara-e-tark-e-ta'alluq kā magar

ret kī to nahīñ dīvār ki Dhā dī jaa.e

vo kahānī jo basī hai mirī sāñsoñ meñ abhī

dil meñ hai aaj unheñ phir se sunā dī jaa.e

un ke yaktā.ī ke dā've kī ye vāzeh tardīd

aa.ine ko koī mā'qūl sazā dī jaa.e

baḳhsh ke qatra-e-shabnam ye taqāzā kyā ḳhuub

chāhte haiñ ki samundar ko du'ā dī jaa.e

aaj kuchh phuul tabassum ke hameñ mil hī gaye

laao mehrāb hī ḳhvāboñ kī sajā dī jaa.e

aaj vīrāñ-kada-e-dil se koī guzregā

ik bisāt-e-gul-o-anjum hī bichhā dī jaa.e

sub.h hogī pas-e-dīvār ḳhamoshī shāyad

ye fasīl-e-shab-e-lab-bastagī Dhā dī jaa.e

pa.e-tā'zīm-e-junūñ uThte haiñ patthar ab tak

ab ye tauqīr-e-junūñ kuchh to ghaTā dī jaa.e

aaj lab par mire ik raaz kī baat aa.ī hai

merī parchhā.īñ zarā duur haTā dī jaa.e

saa.e phāñd aate haiñ rātoñ ko 'na.īmī' ab bhī

aur zindānoñ kī dīvār uThā dī jaa.e

baam-e-KHurshid se raaton ko sada di jae

aur har raushni us ghar ki bujha di jae

kab se behosh paDi hai mere qadmon mein hayat

tu kahe to teri zulfon ki hawa di jae

chand bhi lijiye viran sa sahra nikla

ab tumhein chand se tashbih bhi kya di jae

shukriya mashwara-e-tark-e-ta'alluq ka magar

ret ki to nahin diwar ki Dha di jae

wo kahani jo basi hai meri sanson mein abhi

dil mein hai aaj unhen phir se suna di jae

un ke yaktai ke da'we ki ye wazeh tardid

aaine ko koi ma'qul saza di jae

baKHsh ke qatra-e-shabnam ye taqaza kya KHub

chahte hain ki samundar ko du'a di jae

aaj kuchh phul tabassum ke hamein mil hi gaye

lao mehrab hi KHwabon ki saja di jae

aaj viran-kada-e-dil se koi guzrega

ek bisat-e-gul-o-anjum hi bichha di jae

subh hogi pas-e-diwar KHamoshi shayad

ye fasil-e-shab-e-lab-bastagi Dha di jae

pae-ta'zim-e-junun uThte hain patthar ab tak

ab ye tauqir-e-junun kuchh to ghaTa di jae

aaj lab par mere ek raaz ki baat aai hai

meri parchhain zara dur haTa di jae

sae phand aate hain raaton ko 'naimi' ab bhi

aur zindanon ki diwar uTha di jae