agar hai manzur ye ki howe hamare sine ka dagh ThanDa

agar hai manzūr ye ki hove hamāre siine kā daaġh ThanDā

to aa lipaTiye gale se ai jaañ jhamak se kar jhap charāġh ThanDā

ham aur tum jaañ ab is qadar to mohabbatoñ meñ haiñ ek tan man

lagāyā tum ne jabīñ pe sandal huā hamārā dimāġh ThanDā

laboñ se lagte hī ho ga.ī thī tamām sardī dil-o-jigar meñ

diyā thā saaqī ne raat ham ko kuchh aise mai kā ayāġh ThanDā

daraḳht bhīge haiñ kal ke meñh se chaman chaman meñ bharā hai paanī

jo sair kiije to aaj sāhab ajab tarah kā hai baaġh ThanDā

vahī hai kāmil 'nazīr' is jā vahī hai raushan-dil ai azīzo

havā se duniyā kī jis ke dil kā na hove hargiz charāġh ThanDā

agar hai manzur ye ki howe hamare sine ka dagh ThanDa

to aa lipaTiye gale se ai jaan jhamak se kar jhap charagh ThanDa

hum aur tum jaan ab is qadar to mohabbaton mein hain ek tan man

lagaya tum ne jabin pe sandal hua hamara dimagh ThanDa

labon se lagte hi ho gai thi tamam sardi dil-o-jigar mein

diya tha saqi ne raat hum ko kuchh aise mai ka ayagh ThanDa

daraKHt bhige hain kal ke meinh se chaman chaman mein bhara hai pani

jo sair kije to aaj sahab ajab tarah ka hai bagh ThanDa

wahi hai kaamil 'nazir' is ja wahi hai raushan-dil ai azizo

hawa se duniya ki jis ke dil ka na howe hargiz charagh ThanDa