aap gardan hain haram mein hum harim-e-yar mein

aap gardāñ haiñ haram meñ ham harīm-e-yār meñ

farq kyā hai shaiḳh sāhib momin-o-kuffār meñ

sheḳh-o-panDit kyā dikhā.eñge hameñ rāh-e-najāt

ik asīr-e-tauq-e-tasbīh qaid ik zunnār meñ

pāk-bāzī hai baḌī tauhīn-e-rahmat shaiḳh jī

kījiye kuchh to ḳhatā gar hai yaqīñ ġhaffār meñ

chhīn lenā yā-ḳhudā mujh se mire lauh-o-qalam

gar zavāl aa.e mire ash'ār ke me.aar meñ

tum ne to ka.abe meñ bhī dekhā nahīñ vaa.iz use

ham ko aatā hai nazar vo sūrat-e-dildār meñ

chashm-dīd us ke hazāroñ aur gavāh ik bhī nahīñ

sāmne sab ke huā thā qatl kal bāzār meñ

jurm pe qaabū kiyā ham ne na.ī tarkīb se

ab burī ḳhabreñ nahīñ chhaptīñ kisī aḳhbār meñ

sar-phirā koī banā hai nāzim-e-gulshan 'sadā'

hukm hai ik rang ke bas gul khileñ gulzār meñ

aap gardan hain haram mein hum harim-e-yar mein

farq kya hai shaiKH sahib momin-o-kuffar mein

sheKH-o-panDit kya dikhaenge hamein rah-e-najat

ek asir-e-tauq-e-tasbih qaid ek zunnar mein

pak-bazi hai baDi tauhin-e-rahmat shaiKH ji

kijiye kuchh to KHata gar hai yaqin ghaffar mein

chhin lena ya-KHuda mujh se mere lauh-o-qalam

gar zawal aae mere ash'ar ke mear mein

tum ne to kabe mein bhi dekha nahin waiz use

hum ko aata hai nazar wo surat-e-dildar mein

chashm-did us ke hazaron aur gawah ek bhi nahin

samne sab ke hua tha qatl kal bazar mein

jurm pe qabu kiya hum ne nai tarkib se

ab buri KHabren nahin chhaptin kisi aKHbar mein

sar-phira koi bana hai nazim-e-gulshan 'sada'

hukm hai ek rang ke bas gul khilen gulzar mein