unki nazar ke war ne shair bana diya

un kī nazar ke vaar ne shā'ir banā diyā

ham ko nigāh-e-yār ne shā'ir banā diyā

jis raah par bichhaḌ gaye dil ke makīñ se ham

us rāh-e-yādgār ne shā'ir banā diyā

jis chashm se raqīb ne aañsū bahā diye

us chashm-e-ashk-bār ne shā'ir banā diyā

qisse hamāre yaar ke mash.hūr ho gaye

ham ko hamāre yaar ne shā'ir banā diyā

pahle thā ġham judā.ī kā jo ḳhatm vo huā

phir fikr-e-rozgār ne shā'ir banā diyā

barsoñ ke intizār kā kuchh to sila milā

barsoñ ke intizār ne shā'ir banā diyā

ulfat kā kār-o-bār to mushkil thā 'arsalān'

duniyā ke kār-o-bār ne shā'ir banā diyā

un ki nazar ke war ne sha'ir bana diya

hum ko nigah-e-yar ne sha'ir bana diya

jis rah par bichhaD gaye dil ke makin se hum

us rah-e-yaadgar ne sha'ir bana diya

jis chashm se raqib ne aansu baha diye

us chashm-e-ashk-bar ne sha'ir bana diya

qisse hamare yar ke mashhur ho gaye

hum ko hamare yar ne sha'ir bana diya

pahle tha gham judai ka jo KHatm wo hua

phir fikr-e-rozgar ne sha'ir bana diya

barson ke intizar ka kuchh to sila mila

barson ke intizar ne sha'ir bana diya

ulfat ka kar-o-bar to mushkil tha 'arsalan'

duniya ke kar-o-bar ne sha'ir bana diya