shab-e-firaq ki tarikiyon mein kho jaun

shab-e-firāq kī tārīkiyoñ meñ kho jā.ūñ

maiñ tere baa'd kahīñ lāpata na ho jā.ūñ

chamak uThe mire girye se majlis-e-mātam

kaho to farsh-e-'azā āñsuoñ se dho jā.ūñ

ye merī palkoñ se chhantī hai jo shu'ā'-e-umīd

ye raushnī maiñ tirī aañkh meñ samo jā.ūñ

vo mujh ko rok rahā thā kisī kā hone se

magar ye bol na paayā maiñ us kī ho jā.ūñ

tū chāñd ban ke kabhī merī chhat pe aayā nahīñ

maiñ chāhtī thī tire bāzuoñ meñ so jā.ūñ

tamām log mirā tazkira kareñ din raat

diloñ meñ biij mohabbat kā aisā bo jā.ūñ

kisī sitāre ne mujh ko bachā liyā thā 'umūd'

qarīb thā ki maiñ us tīrgī meñ kho jā.ūñ

shab-e-firaq ki tarikiyon mein kho jaun

main tere ba'd kahin lapata na ho jaun

chamak uThe mere girye se majlis-e-matam

kaho to farsh-e-'aza aansuon se dho jaun

ye meri palkon se chhanti hai jo shu'a'-e-umid

ye raushni main teri aankh mein samo jaun

wo mujh ko rok raha tha kisi ka hone se

magar ye bol na paya main us ki ho jaun

tu chand ban ke kabhi meri chhat pe aaya nahin

main chahti thi tere bazuon mein so jaun

tamam log mera tazkira karen din raat

dilon mein bij mohabbat ka aisa bo jaun

kisi sitare ne mujh ko bacha liya tha 'umud'

qarib tha ki main us tirgi mein kho jaun