rudad-e-gham sunai to aansu nikal paDe

rūdād-e-ġham sunā.ī to aañsū nikal paḌe

duniyā samajh meñ aa.ī to aañsū nikal paḌe

is shahr meñ haiñ kitnī musallat ḳhamoshiyāñ

āvāz ik lagā.ī to aañsū nikal paḌe

dekhā thā ham ne raa.ī ko bante hue pahāḌ

parbat huā jo raa.ī to aañsū nikal paḌe

maiñ ne tumhāre vāste sab kuchh luTā diyā

kī tum ne be-vafā.ī to aañsū nikal paḌe

ġhairoñ ne har qadam pe sahārā diyā mujhe

apnoñ se choT khaa.ī to aañsū nikal paḌe

jis pe kiyā bharosa usī ne diyā fareb

chāhat na raas aa.ī to aañsū nikal paḌe

'muztar' sunā thā bante haiñ us bazm meñ nasīb

taqdīr āzmā.ī to aañsū nikal paḌe

rudad-e-gham sunai to aansu nikal paDe

duniya samajh mein aai to aansu nikal paDe

is shahr mein hain kitni musallat KHamoshiyan

aawaz ek lagai to aansu nikal paDe

dekha tha hum ne rai ko bante hue pahaD

parbat hua jo rai to aansu nikal paDe

main ne tumhaare waste sab kuchh luTa diya

ki tum ne be-wafai to aansu nikal paDe

ghairon ne har qadam pe sahaara diya mujhe

apnon se choT khai to aansu nikal paDe

jis pe kiya bharosa usi ne diya fareb

chahat na ras aai to aansu nikal paDe

'muztar' suna tha bante hain us bazm mein nasib

taqdir aazmai to aansu nikal paDe