kisi ke hijr mein sine ke gham kahan jate

kisī ke hijr meñ siine ke ġham kahāñ jaate

jo dil meñ dard na hotā to ham kahāñ jaate

na shauq-e-zīst hī rahtā na justujū koī

to phir batāo ki ahl-e-karam kahāñ jaate

na yaad hotī na koī umiid is dil ko

na hote vasl ke vā'de to ham kahāñ jaate

ye kis ne dil ko mohabbat kā dard baḳhshā hai

na girte ashk to ham chashm-e-nam kahāñ jaate

na koī ḳhvāb bikhartā na dil meñ ġham hotā

na hotā 'ishq to phir ahl-e-ġham kahāñ jaate

ye dard hī to hameñ aa.ina dikhātā hai

na hote ham to ye ahl-e-sitam kahāñ jaate

mire sifāl ne rakkhī hai aabrū 'vāris'

vagarna DhūñDne ham jām-e-jam kahāñ jaate

kisi ke hijr mein sine ke gham kahan jate

jo dil mein dard na hota to hum kahan jate

na shauq-e-zist hi rahta na justuju koi

to phir batao ki ahl-e-karam kahan jate

na yaad hoti na koi umid is dil ko

na hote wasl ke wa'de to hum kahan jate

ye kis ne dil ko mohabbat ka dard baKHsha hai

na girte ashk to hum chashm-e-nam kahan jate

na koi KHwab bikharta na dil mein gham hota

na hota 'ishq to phir ahl-e-gham kahan jate

ye dard hi to hamein aaina dikhata hai

na hote hum to ye ahl-e-sitam kahan jate

mere sifal ne rakkhi hai aabru 'waris'

wagarna DhunDne hum jam-e-jam kahan jate