jo gaya tha chhoD ke be-sabab use dard-e-dil ka pata nahin

jo gayā thā chhoḌ ke be-sabab use dard-e-dil kā pata nahīñ

ki charāġh yaad kā baam par jo jalā thā ab bhī bujhā nahīñ

kahīñ āñsuoñ kī haiñ bārisheñ kahīñ tishnagī kī navāzisheñ

yahāñ kaisā saaqī nizām hai yahāñ jaam sab ko milā nahīñ

mujhe aisā kis ne banā diyā mirī har samajh ko miTā diyā

koī lafz yaad nahīñ rahe koī she'r us pe huā nahīñ

chalo ḳhāmushī ke dayār meñ kisī gulsitāñ ke kinār meñ

vahī āñkhoñ āñkhoñ meñ zikr ho jo kabhī kisī se kahā nahīñ

yahāñ dil meñ dil kā qayām hai yahāñ nafrateñ to harām haiñ

ye mohabbatoñ kā jahān hai yahāñ 'ishq karnā ḳhatā nahīñ

mirī āñkhoñ ko zarā dekh le vahī nuur hai vahī aas hai

abhī 'aks terā hai hū-ba-hū abhī rang koī chaḌhā nahīñ

ye 'ajab nasīb hai 'bhāvnā' tirā jhūTā jhūTā hai aa.ina

mujhe dekh kar vo hañsā magar mirā chehra us ne paḌhā nahīñ

jo gaya tha chhoD ke be-sabab use dard-e-dil ka pata nahin

ki charagh yaad ka baam par jo jala tha ab bhi bujha nahin

kahin aansuon ki hain barishen kahin tishnagi ki nawazishen

yahan kaisa saqi nizam hai yahan jam sab ko mila nahin

mujhe aisa kis ne bana diya meri har samajh ko miTa diya

koi lafz yaad nahin rahe koi she'r us pe hua nahin

chalo KHamushi ke dayar mein kisi gulsitan ke kinar mein

wahi aankhon aankhon mein zikr ho jo kabhi kisi se kaha nahin

yahan dil mein dil ka qayam hai yahan nafraten to haram hain

ye mohabbaton ka jahan hai yahan 'ishq karna KHata nahin

meri aankhon ko zara dekh le wahi nur hai wahi aas hai

abhi 'aks tera hai hu-ba-hu abhi rang koi chaDha nahin

ye 'ajab nasib hai 'bhawna' tera jhuTa jhuTa hai aaina

mujhe dekh kar wo hansa magar mera chehra us ne paDha nahin