fuzul karte ho jina muhaal shair ka

fuzūl karte ho jiinā muhāl shā'ir kā

vo jī rahā hai yahī hai kamāl shā'ir kā

jhijak rahā hai vo pahlū meñ is tarah aate

ki jaise sahmā huā ik ḳhayāl shā'ir kā

sañbhāltā hai vo jis tarh aag lafzoñ kī

sañbhāl tum nahīñ sakte vabāl shā'ir kā

ye titliyoñ ke paroñ se tarāshnā misre'

lahū ko rang banānā kamāl shā'ir kā

kise ḳhabar hai tire kāġhazī gulistāñ ko

jalā ke raakh na kar de jalāl shā'ir kā

ye āñsuoñ kī amānat hai lafz kā parda

isī se bantā hai saarā malāl shā'ir kā

zarā sā sabr karo maiñ uThā ke laatā huuñ

tumhāre rū-barū chehra niDhāl shā'ir kā

udāsiyoñ meñ vo ḳhushiyoñ kī aañch rakhtā hai

usī tapish se sañvartā hai haal shā'ir kā

vo apne dard ko likhtā hai ik davā kī tarah

tū apnī marzī se misra' uchhāl shā'ir kā

zarā sā husn-e-nazar se to dekh lo 'ehsān'

tumhāre ḳhvāb bunegā kamāl shā'ir kā

fuzul karte ho jina muhaal sha'ir ka

wo ji raha hai yahi hai kamal sha'ir ka

jhijak raha hai wo pahlu mein is tarah aate

ki jaise sahma hua ek KHayal sha'ir ka

sanbhaalta hai wo jis tarh aag lafzon ki

sanbhaal tum nahin sakte wabaal sha'ir ka

ye titliyon ke paron se tarashna misre'

lahu ko rang banana kamal sha'ir ka

kise KHabar hai tere kaghazi gulistan ko

jala ke rakh na kar de jalal sha'ir ka

ye aansuon ki amanat hai lafz ka parda

isi se banta hai sara malal sha'ir ka

zara sa sabr karo main uTha ke lata hun

tumhaare ru-baru chehra niDhaal sha'ir ka

udasiyon mein wo KHushiyon ki aanch rakhta hai

usi tapish se sanwarta hai haal sha'ir ka

wo apne dard ko likhta hai ek dawa ki tarah

tu apni marzi se misra' uchhaal sha'ir ka

zara sa husn-e-nazar se to dekh lo 'ehsan'

tumhaare KHwab bunega kamal sha'ir ka