chashm-e-nam se sharar ke manind

chashm-e-nam se sharār ke mānind

ashk bahte haiñ dhaar ke mānind

ḳhush-nasīboñ ke biich rahte haiñ

ham muqaddar-figār ke mānind

kyoñ darīchoñ se jhāñktā hai chāñd

raat bhar mere yaar ke mānind

'ārzī hai hañsī mire lab kī

chamchamāte ġhubār ke mānind

jagmagātī nahīñ haiñ ab āñkheñ

gauhar-e-ābdār ke mānind

ham jinheñ gul-badan samajhte haiñ

chubhne lagte haiñ ḳhaar ke mānind

vasl meñ lutf-e-zikr-e-yār kahāñ

hijr ke intizār ke mānind

dil kā gulshan ujaḌne vaalā hai

koī aa.e bahār ke mānind

gul bhī taḌpegā ek din 'nāsir'

bulbul-e-be-qarār ke mānind

chashm-e-nam se sharar ke manind

ashk bahte hain dhaar ke manind

KHush-nasibon ke bich rahte hain

hum muqaddar-figar ke manind

kyon darichon se jhankta hai chand

raat bhar mere yar ke manind

'arzi hai hansi mere lab ki

chamchamate ghubar ke manind

jagmagati nahin hain ab aankhen

gauhar-e-abdar ke manind

hum jinhen gul-badan samajhte hain

chubhne lagte hain KHar ke manind

wasl mein lutf-e-zikr-e-yar kahan

hijr ke intizar ke manind

dil ka gulshan ujaDne wala hai

koi aae bahaar ke manind

gul bhi taDpega ek din 'nasir'

bulbul-e-be-qarar ke manind