apni aankhon se ye dekha rah-e-sailab mein the

apnī āñkhoñ se ye dekhā rah-e-sailāb meñ the

haa.e vo log ki jo atlas o kam-ḳhvāb meñ the

luT ga.e sub.h ke hote hī vagarna shab bhar

kyā hasīñ ḳhvāb mire dīda-e-be-ḳhvāb meñ the

jhuk ga.e bār-e-tamannā se kamāñ kī sūrat

valvale kitne vagarna dil-e-betāb meñ the

raat bhar aañch jinheñ apne badan se aa.ī

nār-e-dozaḳh meñ the vo yā shab-e-mahtāb meñ the

ek ik kar ke sitāroñ kī tarah Duub ga.e

haa.e kyā log mire halqa-e-ahbāb meñ the

shab-e-tīra bhī ujāloñ se thī raushan 'mohsin'

kitne ḳhurshīd mire dīda-e-pur-āb meñ the

apni aankhon se ye dekha rah-e-sailab mein the

hae wo log ki jo atlas o kam-KHwab mein the

luT gae subh ke hote hi wagarna shab bhar

kya hasin KHwab mere dida-e-be-KHwab mein the

jhuk gae bar-e-tamanna se kaman ki surat

walwale kitne wagarna dil-e-betab mein the

raat bhar aanch jinhen apne badan se aai

nar-e-dozaKH mein the wo ya shab-e-mahtab mein the

ek ek kar ke sitaron ki tarah Dub gae

hae kya log mere halqa-e-ahbab mein the

shab-e-tira bhi ujalon se thi raushan 'mohsin'

kitne KHurshid mere dida-e-pur-ab mein the