aisi chup mein lab-e-izhaar ka jadu tu hai

aisī chup meñ lab-e-iz.hār kā jaadū tū hai

misra'-e-mīr hai parvīn kī ḳhushbū tū hai

phir tirī yaad kī umḌī hai udāsī mujh meñ

phir mirī aañkh meñ aayā huā aañsū tū hai

ye jo maiñ she'r suhūlat se likhe jaatā huuñ

kyuuñ na likkhūñ ki mirī jaañ mirī urdu tū hai

dauḌte phirte haiñ 'ushshāq divānoñ kī tarah

bach ke jā.eñge kahāñ jab ki har ik sū tū hai

tujh meñ jo baiTh ke maiñ kheñch rahā huuñ chilla

kyuuñ na khīñchūñ ki mirā hujra-e-bāhū tū hai

ek chehra jo taḳhayyul meñ rahā hai barsoñ

DhūñDtā phirtā huuñ jis ko vahī ḳhush-rū tū hai

mere kis kaam ke ye vird vazīfe 'adnān'

koī bhī toḌ nahīñ jis kā vo jaadū tū hai

aisi chup mein lab-e-izhaar ka jadu tu hai

misra'-e-mir hai parwin ki KHushbu tu hai

phir teri yaad ki umDi hai udasi mujh mein

phir meri aankh mein aaya hua aansu tu hai

ye jo main she'r suhulat se likhe jata hun

kyun na likkhun ki meri jaan meri urdu tu hai

dauDte phirte hain 'ushshaq diwanon ki tarah

bach ke jaenge kahan jab ki har ek su tu hai

tujh mein jo baiTh ke main khench raha hun chilla

kyun na khinchun ki mera hujra-e-bahu tu hai

ek chehra jo taKHayyul mein raha hai barson

DhunDta phirta hun jis ko wahi KHush-ru tu hai

mere kis kaam ke ye wird wazife 'adnan'

koi bhi toD nahin jis ka wo jadu tu hai