aaKHiri Tis aazmane ko

āḳhirī Tiis āzmāne ko

jī to chāhā thā muskurāne ko

yaad itnī bhī saḳht-jāñ to nahīñ

ik gharauñdā rahā hai Dhāne ko

sañg-rezo meñ Dhal ga.e aañsū

log hañste rahe dikhāne ko

zaḳhm-e-naġhma bhī lau to detā hai

ik diyā rah gayā jalāne ko

jalne vaale to jal bujhe āḳhir

kaun detā ḳhabar zamāne ko

kitne majbūr ho ga.e hoñge

an-kahī baat muñh pe laane ko

khul ke hañsnā to sab ko aatā hai

log tarse haiñ ik bahāne ko

reza reza bikhar gayā insāñ

dil kī vīrāniyāñ jatāne ko

hasratoñ kī panāh-gāhoñ meñ

kyā Thikāne haiñ sar chhupāne ko

haath kāñToñ se kar liye zaḳhmī

phuul bāloñ meñ ik sajāne ko

aas kī baat ho ki saañs 'adā'

ye khilaune the TuuT jaane ko

aaKHiri Tis aazmane ko

ji to chaha tha muskurane ko

yaad itni bhi saKHt-jaan to nahin

ek gharaunda raha hai Dhane ko

sang-rezo mein Dhal gae aansu

log hanste rahe dikhane ko

zaKHm-e-naghma bhi lau to deta hai

ek diya rah gaya jalane ko

jalne wale to jal bujhe aaKHir

kaun deta KHabar zamane ko

kitne majbur ho gae honge

an-kahi baat munh pe lane ko

khul ke hansna to sab ko aata hai

log tarse hain ek bahane ko

reza reza bikhar gaya insan

dil ki viraniyan jatane ko

hasraton ki panah-gahon mein

kya Thikane hain sar chhupane ko

hath kanTon se kar liye zaKHmi

phul baalon mein ek sajaane ko

aas ki baat ho ki sans 'ada'

ye khilaune the TuT jaane ko