aaj jalti hui har shama bujha di jae

aaj jaltī huī har sham.a bujhā dī jaa.e

ġham kī tauqīr zarā aur baḌhā dī jaa.e

kyā isī vāste sīñchā thā lahū se apne

jab sañvar jaa.e chaman aag lagā dī jaa.e

aql kā hukm ki sāhil se lagā do kashtī

dil kā isrār ki tūfāñ se laḌā dī jaa.e

duur tak dil meñ dikhā.ī nahīñ detā koī

aise vīrāne meñ ab kis ko sadā dī jaa.e

tabsira ba.ad meñ bhī qatl pe ho saktā hai

pahle ye laash to raste se haTā dī jaa.e

maslahat ab to isī meñ nazar aatī hai 'alī'

ki hañsī aa.e to ashkoñ meñ bahā dī jaa.e

aaj jalti hui har shama bujha di jae

gham ki tauqir zara aur baDha di jae

kya isi waste sincha tha lahu se apne

jab sanwar jae chaman aag laga di jae

aql ka hukm ki sahil se laga do kashti

dil ka israr ki tufan se laDa di jae

dur tak dil mein dikhai nahin deta koi

aise virane mein ab kis ko sada di jae

tabsira baad mein bhi qatl pe ho sakta hai

pahle ye lash to raste se haTa di jae

maslahat ab to isi mein nazar aati hai 'ali'

ki hansi aae to ashkon mein baha di jae