aaina kyun na dun ki tamasha kahen jise

ā.īna kyuuñ na duuñ ki tamāshā kaheñ jise

aisā kahāñ se lā.ūñ ki tujh sā kaheñ jise

hasrat ne lā rakhā tirī bazm-e-ḳhayāl meñ

gul-dasta-e-nigāh suvaidā kaheñ jise

phūñkā hai kis ne gosh-e-mohabbat meñ ai ḳhudā

afsūn-e-intizār tamannā kaheñ jise

sar par hujūm-e-dard-e-ġharībī se Dāliye

vo ek musht-e-ḳhāk ki sahrā kaheñ jise

hai chashm-e-tar meñ hasrat-e-dīdār se nihāñ

shauq-e-ināñ guseḳhta dariyā kaheñ jise

darkār hai shaguftan-e-gul-hā-e-aish ko

sub.h-e-bahār pumba-e-mīnā kaheñ jise

'ġhālib' burā na maan jo vaa.iz burā kahe

aisā bhī koī hai ki sab achchhā kaheñ jise

hai intizār se sharar ābād rustaḳhez

mizhgān-e-koh-kan rag-e-ḳhārā kaheñ jise

kis fursat-e-visāl pe hai gul ko andalīb

zaḳhm-e-firāq ḳhanda-e-be-jā kaheñ jise

aaina kyun na dun ki tamasha kahen jise

aisa kahan se laun ki tujh sa kahen jise

hasrat ne la rakha teri bazm-e-KHayal mein

gul-dasta-e-nigah suwaida kahen jise

phunka hai kis ne gosh-e-mohabbat mein ai KHuda

afsun-e-intizar tamanna kahen jise

sar par hujum-e-dard-e-gharibi se Daliye

wo ek musht-e-KHak ki sahra kahen jise

hai chashm-e-tar mein hasrat-e-didar se nihan

shauq-e-inan guseKHta dariya kahen jise

darkar hai shaguftan-e-gul-ha-e-aish ko

subh-e-bahaar pumba-e-mina kahen jise

'ghaalib' bura na man jo waiz bura kahe

aisa bhi koi hai ki sab achchha kahen jise

hai intizar se sharar aabaad rustaKHez

mizhgan-e-koh-kan rag-e-KHara kahen jise

kis fursat-e-visal pe hai gul ko andalib

zaKHm-e-firaq KHanda-e-be-ja kahen jise