aahaT bhi agar ki to tah-e-zat nahin ki

aahaT bhī agar kī to tah-e-zāt nahīñ kī

lafzoñ ne ka.ī din se koī baat nahīñ kī

iz.hār na āñkheñ na tahakkum na qarīna

lahje ne bhī arse se mulāqāt nahīñ kī

isrār thā māthe pe na āñkhoñ meñ namī thī

tum ne to ri.āyat bhī mire saath nahīñ kī

tartīb diyā us ke liye shor-e-anā ko

ham ne bhī ka.ī din se bahut raat nahīñ kī

do chaar havāoñ ke qadam dhuup ke chhīñTe

'jāved' ne sheroñ meñ na.ī baat nahīñ kī

aahaT bhi agar ki to tah-e-zat nahin ki

lafzon ne kai din se koi baat nahin ki

izhaar na aankhen na tahakkum na qarina

lahje ne bhi arse se mulaqat nahin ki

israr tha mathe pe na aankhon mein nami thi

tum ne to riayat bhi mere sath nahin ki

tartib diya us ke liye shor-e-ana ko

hum ne bhi kai din se bahut raat nahin ki

do chaar hawaon ke qadam dhup ke chhinTe

'jawed' ne sheron mein nai baat nahin ki