roz-o-shab sahib-e-takrar se baaten karna

roz-o-shab sāhib-e-takrār se bāteñ karnā

mashġhala hai mirā dīvār se bāteñ karnā

mashvara hai ye aziyyat meñ badalnā rāhat

aur phir baiTh ke āzār se bāteñ karnā

jaao kuchh zauq-e-faqīrī to dikhāo pahle

phir kisī sāhib-e-asrār se bāteñ karnā

yaad aatā hai vo saḌkoñ pe Tahalnā pahroñ

aur us par vo tirā pyaar se bāteñ karnā

vo bhalā kaise lagā.egā 'alī kā nā'ra

jis ko aatā hī nahīñ daar se bāteñ karnā

mujh ko apnā na samajh phir bhī koī baat to kar

bā'is-e-ajr hai bīmār se bāteñ karnā

dil meñ jab zaat kā 'irfān numū ho 'haidar'

phir kisī ā.ina-bardār se bāteñ karnā

roz-o-shab sahib-e-takrar se baaten karna

mashghala hai mera diwar se baaten karna

mashwara hai ye aziyyat mein badalna rahat

aur phir baiTh ke aazar se baaten karna

jao kuchh zauq-e-faqiri to dikhao pahle

phir kisi sahib-e-asrar se baaten karna

yaad aata hai wo saDkon pe Tahalna pahron

aur us par wo tera pyar se baaten karna

wo bhala kaise lagaega 'ali ka na'ra

jis ko aata hi nahin dar se baaten karna

mujh ko apna na samajh phir bhi koi baat to kar

ba'is-e-ajr hai bimar se baaten karna

dil mein jab zat ka 'irfan numu ho 'haidar'

phir kisi aaina-bardar se baaten karna