aag ashk-e-garm ko lage ji kya hi jal gaya

aag ashk-e-garm ko lage jī kyā hī jal gayā

aañsū chū us ne poñchhe shab aur haath phal gayā

phoḌā thā dil na thā ye mue par ḳhalal gayā

jab Thes saañs kī lagī dam hī nikal gayā

kyā ro.uuñ ḳhīra-chashmī-e-baḳht-e-siyāh ko

vaañ shaġhl-e-surma hai abhī yaañ sail Dhal gayā

kī mujh ko haath malne kī ta.alīm varna kyuuñ

ġhairoñ ko aage bazm meñ vo itr mal gayā

us kūche kī havā thī ki merī hī aah thī

koī to dil kī aag pe pankhā sā jhal gayā

joñ ḳhuftagān-e-ḳhāk hai apnī fatādgī

aayā jo zalzala kabhī karvaT badal gayā

us naqsh-e-pā ke sajde ne kyā kyā kiyā zalīl

maiñ kūcha-e-raqīb meñ bhī sar ke bal gayā

kuchh jī girā paḌe thā par ab tū ne naaz se

mujh ko girā diyā to mirā jī sañbhal gayā

mil jaa.e gar ye ḳhaak meñ us ne vahāñ kī ḳhaak

gul kī thī kyuuñ ki paañv vo nāzuk phisal gayā

but-ḳhāne se na ka.abe ko taklīf de mujhe

'momin' bas ab muaaf ki yaañ jī bahal gayā

aag ashk-e-garm ko lage ji kya hi jal gaya

aansu chu us ne ponchhe shab aur hath phal gaya

phoDa tha dil na tha ye mue par KHalal gaya

jab Thes sans ki lagi dam hi nikal gaya

kya roun KHira-chashmi-e-baKHt-e-siyah ko

wan shaghl-e-surma hai abhi yan sail Dhal gaya

ki mujh ko hath malne ki talim warna kyun

ghairon ko aage bazm mein wo itr mal gaya

us kuche ki hawa thi ki meri hi aah thi

koi to dil ki aag pe pankha sa jhal gaya

jon KHuftagan-e-KHak hai apni fatadgi

aaya jo zalzala kabhi karwaT badal gaya

us naqsh-e-pa ke sajde ne kya kya kiya zalil

main kucha-e-raqib mein bhi sar ke bal gaya

kuchh ji gira paDe tha par ab tu ne naz se

mujh ko gira diya to mera ji sanbhal gaya

mil jae gar ye KHak mein us ne wahan ki KHak

gul ki thi kyun ki panw wo nazuk phisal gaya

but-KHane se na kabe ko taklif de mujhe

'momin' bas ab muaf ki yan ji bahal gaya