aadat se unki dil ko KHushi bhi hai gham bhi hai

aadat se un kī dil ko ḳhushī bhī hai ġham bhī hai

ye lutf hai sitam bhī hai uzr-e-sitam bhī hai

ulfat mujhe jatāte ho dil meñ bhī dard hai

rone kā muñh banāte ho āñkhoñ meñ nam bhī hai

is but kā vasl thā to ḳhudā.ī kā aish thā

ye jānte na the ki zamāne meñ ġham bhī hai

taskīn mere dil kī aur us bevafā kā qaul

dil meñ fareb bhī hai laboñ par qasam bhī hai

ab aao mil ke so raheñ takrār ho chukī

āñkhoñ meñ niiñd bhī hai bahut raat kam bhī hai

naumīdī bhī hai vasl se us ke umiid bhī

kuchh dard-e-dil baḌhā bhī hai kuchh rañj kam bhī hai

ye baat gar na ho to kare kaun hausla

milnā kisī kā sahl bhī hai aur alam bhī hai

jaatā hai shak bhī kar gayā hai vahm meñ vo shoḳh

kūche meñ ġhair hī ke nishān-e-qadam bhī hai

bāham tapāk bhī haiñ kabhī ranjisheñ bhī haiñ

lutf-o-karam bhī hai kabhī jaur-o-sitam bhī hai

aa jaa.eñ vo magar mujhe aatā nahīñ yaqīñ

qāsid kā jo hai qaul vo ḳhat meñ raqam bhī hai

bigḌe hue haiñ aaj ḳhudā ḳhair hī kare

kuchh bal bhī hai jabīñ pe kuchh abrū pe ḳham bhī hai

mar jaate ham to kab ke ajal dekhtī hai tū

fursat kisī ke ġham se hameñ koī dam bhī hai

kahne ko do makāñ haiñ kiiñ to hai ek hī

bait-us-sanam hai jo vahī bait-ul-haram bhī hai

yuuñ kah ke bhuul jaanā ye ḳhū aap hī kī hai

mujh ko vo yaad ahd bhī hai vo qasam bhī hai

jab kuchh kahūñ to kahte haiñ ye phir sunūñgā maiñ

phir aisā koī vaqt bhī hai koī dam bhī hai

kaisā visāl o hijr agar fahm hai 'nizām'

har haal meñ judā bhī hai vo aur baham bhī hai

aadat se un ki dil ko KHushi bhi hai gham bhi hai

ye lutf hai sitam bhi hai uzr-e-sitam bhi hai

ulfat mujhe jatate ho dil mein bhi dard hai

rone ka munh banate ho aankhon mein nam bhi hai

is but ka wasl tha to KHudai ka aish tha

ye jaante na the ki zamane mein gham bhi hai

taskin mere dil ki aur us bewafa ka qaul

dil mein fareb bhi hai labon par qasam bhi hai

ab aao mil ke so rahen takrar ho chuki

aankhon mein nind bhi hai bahut raat kam bhi hai

naumidi bhi hai wasl se us ke umid bhi

kuchh dard-e-dil baDha bhi hai kuchh ranj kam bhi hai

ye baat gar na ho to kare kaun hausla

milna kisi ka sahl bhi hai aur alam bhi hai

jata hai shak bhi kar gaya hai wahm mein wo shoKH

kuche mein ghair hi ke nishan-e-qadam bhi hai

baham tapak bhi hain kabhi ranjishen bhi hain

lutf-o-karam bhi hai kabhi jaur-o-sitam bhi hai

aa jaen wo magar mujhe aata nahin yaqin

qasid ka jo hai qaul wo KHat mein raqam bhi hai

bigDe hue hain aaj KHuda KHair hi kare

kuchh bal bhi hai jabin pe kuchh abru pe KHam bhi hai

mar jate hum to kab ke ajal dekhti hai tu

fursat kisi ke gham se hamein koi dam bhi hai

kahne ko do makan hain kin to hai ek hi

bait-us-sanam hai jo wahi bait-ul-haram bhi hai

yun kah ke bhul jaana ye KHu aap hi ki hai

mujh ko wo yaad ahd bhi hai wo qasam bhi hai

jab kuchh kahun to kahte hain ye phir sununga main

phir aisa koi waqt bhi hai koi dam bhi hai

kaisa visal o hijr agar fahm hai 'nizam'

har haal mein juda bhi hai wo aur baham bhi hai