aab-dida jab unhen chhoD ke jaana hoga

āb-dīda jab unheñ chhoḌ ke jaanā hogā

vo zamāna bhī qayāmat kā zamāna hogā

nafratoñ se to ḳhilāf aur zamāna hogā

dost banñe ke liye dost banānā hogā

jī na Thahrā to bahar-hāl mileñge un se

shikva-e-jaur-o-taġhāful to bahāna hogā

āḳhir ab kyuuñ haiñ vo betāb-e-marāsim itne

un ke siine meñ koī ranj purānā hogā

kahīñ be-tark-e-kudūrat bhī mile haiñ do dil

dar banānā hai to dīvār ko Dhānā hogā

hai nayā moḌ añdheroñ kā baḌā sabr talab

ab charāġhoñ kī tarah dil bhī jalānā hogā

tere kūche meñ agar chhāñv mayassar na huī

phir kahāñ dard ke māroñ kā Thikānā hogā

rishta-e-dil to na TūTegā tirī mahfil se

ham na hoñge to mohabbat kā fasāna hogā

ham ko tajdīd-e-mulāqāt se kab hai inkār

lekin ab pahle unheñ haath baḌhānā hogā

hāl-e-dil un ko sunāyā bhī to kyā hāsil hai

yuuñ bhī dil apne hī tīroñ kā nishāna hogā

dar-e-mahbūb hai apnā to kinārā 'iqbāl'

be-sahārā hue to Duub ke jaanā hogā

aab-dida jab unhen chhoD ke jaana hoga

wo zamana bhi qayamat ka zamana hoga

nafraton se to KHilaf aur zamana hoga

dost banne ke liye dost banana hoga

ji na Thahra to bahar-haal milenge un se

shikwa-e-jaur-o-taghaful to bahana hoga

aaKHir ab kyun hain wo betab-e-marasim itne

un ke sine mein koi ranj purana hoga

kahin be-tark-e-kudurat bhi mile hain do dil

dar banana hai to diwar ko Dhana hoga

hai naya moD andheron ka baDa sabr talab

ab charaghon ki tarah dil bhi jalana hoga

tere kuche mein agar chhanw mayassar na hui

phir kahan dard ke maron ka Thikana hoga

rishta-e-dil to na TuTega teri mahfil se

hum na honge to mohabbat ka fasana hoga

hum ko tajdid-e-mulaqat se kab hai inkar

lekin ab pahle unhen hath baDhana hoga

haal-e-dil un ko sunaya bhi to kya hasil hai

yun bhi dil apne hi tiron ka nishana hoga

dar-e-mahbub hai apna to kinara 'iqbaal'

be-sahaara hue to Dub ke jaana hoga