aa ke sajjada-nashin qais hua mere baad

aa ke sajjāda-nashīñ qais huā mere baa'd

na rahī dasht meñ ḳhālī koī jā mere baa'd

miyān meñ us ne jo kī teġh-e-jafā mere baa'd

ḳhūñ-girafta koī kyā aur na thā mere baa'd

dostī kā bhī tujhe paas na aayā hai-hai

tū ne dushman se kiyā merā gilā mere baa'd

garm-bāzārī-e-ulfat hai mujhī se varna

koī lene kā nahīñ nām-e-vafā mere baa'd

muñh pe le dāman-e-gul ro.eñge murġhān-e-chaman

baaġh meñ ḳhaak uḌā.egī sabā mere baa'd

chaak isī ġham se garebān kiyā hai maiñ ne

kaun kholegā tire band-e-qabā mere baa'd

ab to hañs hañs ke lagātā hai vo mehñdī lekin

ḳhuun rulā degā use rang-e-hinā mere baa'd

maiñ to gulzār se dil-tañg chalā ġhuncha-ravish

mujh ko kyā phir jo koī phuul khilā mere baa'd

vo havā-ḳhvāh-e-chaman huuñ ki chaman meñ har sub.h

pahle maiñ jaatā thā aur bād-e-sabā mere baa'd

sun ke marne kī ḳhabar yaar mire ghar aayā

yā'nī maqbūl huī merī vafā mere baa'd

zab.h kar ke mujhe nādim ye huā vo qātil

haath meñ phir kabhī ḳhanjar na liyā mere baa'd

merī hī zamzama-sanjī se chaman thā ābād

kiyā sayyād ne ik ik ko rihā mere baa'd

aa gayā biich meñ us zulf kī ik maiñ nādāñ

na huā koī giraftār-e-balā mere baa'd

qatl to karte ho par ḳhuub hī pachhtāoge

mujh sā milne kā nahīñ ahl-e-vafā mere baa'd

barg-e-gul laa.ī sabā qabr pe merī na nasīm

phir ga.ī aisī zamāne kī huā mere baa'd

gir paḌe aañkh se us kī bhī yakāyak aañsū

zikr mahfil meñ jo kuchh merā huā mere baa'd

zer-e-shamshīr yahī soch hai maqtal meñ mujhe

dekhiye ab kise laatī hai qazā mere baa'd

shart-e-yārī yahī hotī hai ki tū ne 'ġhāfil'

bhuul kar bhī na mujhe yaad kiyā mere baa'd

aa ke sajjada-nashin qais hua mere ba'd

na rahi dasht mein KHali koi ja mere ba'd

miyan mein us ne jo ki tegh-e-jafa mere ba'd

KHun-girafta koi kya aur na tha mere ba'd

dosti ka bhi tujhe pas na aaya hai-hai

tu ne dushman se kiya mera gila mere ba'd

garm-bazari-e-ulfat hai mujhi se warna

koi lene ka nahin nam-e-wafa mere ba'd

munh pe le daman-e-gul roenge murghan-e-chaman

bagh mein KHak uDaegi saba mere ba'd

chaak isi gham se gareban kiya hai main ne

kaun kholega tere band-e-qaba mere ba'd

ab to hans hans ke lagata hai wo mehndi lekin

KHun rula dega use rang-e-hina mere ba'd

main to gulzar se dil-tang chala ghuncha-rawish

mujh ko kya phir jo koi phul khila mere ba'd

wo hawa-KHwah-e-chaman hun ki chaman mein har subh

pahle main jata tha aur baad-e-saba mere ba'd

sun ke marne ki KHabar yar mere ghar aaya

ya'ni maqbul hui meri wafa mere ba'd

zabh kar ke mujhe nadim ye hua wo qatil

hath mein phir kabhi KHanjar na liya mere ba'd

meri hi zamzama-sanji se chaman tha aabaad

kiya sayyaad ne ek ek ko riha mere ba'd

aa gaya bich mein us zulf ki ek main nadan

na hua koi giraftar-e-bala mere ba'd

qatl to karte ho par KHub hi pachhtaoge

mujh sa milne ka nahin ahl-e-wafa mere ba'd

barg-e-gul lai saba qabr pe meri na nasim

phir gai aisi zamane ki hua mere ba'd

gir paDe aankh se us ki bhi yakayak aansu

zikr mahfil mein jo kuchh mera hua mere ba'd

zer-e-shamshir yahi soch hai maqtal mein mujhe

dekhiye ab kise lati hai qaza mere ba'd

shart-e-yari yahi hoti hai ki tu ne 'ghafil'

bhul kar bhi na mujhe yaad kiya mere ba'd