aa jao ki mil kar hum jine ki bina Dalen

aa jaao ki mil kar ham jiine kī binā Dāleñ

ye bār-e-hayāt ai dost uThne kā nahīñ tanhā

duniyā pe musallat hai auhām kī tārīkī

ham haiñ ki jalā.e haiñ ik sham-e-yaqīñ tanhā

muhtāj-e-tavajjoh haiñ kuchh aur masā.il bhī

kyuuñ zehn meñ phirtī hai ik nān-e-javīñ tanhā

har murġh-e-ḳhush-alhāñ ab parvāz pe maa.il hai

gulshan meñ na rah jaa.e sayyād kahīñ tanhā

sajde dar-e-jānāñ par lākhoñ ne kiye lekin

me.ār-e-vafā Thahrī merī hī jabīñ tanhā

ik husn-e-tasavvur hai jo ziist kā sāthī hai

vo koī bhī manzil ho ham log nahīñ tanhā

nazdīk 'hafīz' is ke riñd aa.eñ to kyā aa.eñ

jāgīr hai zāhid kī sarmāya-e-deñ tanhā

aa jao ki mil kar hum jine ki bina Dalen

ye bar-e-hayat ai dost uThne ka nahin tanha

duniya pe musallat hai auham ki tariki

hum hain ki jalae hain ek sham-e-yaqin tanha

muhtaj-e-tawajjoh hain kuchh aur masail bhi

kyun zehn mein phirti hai ek nan-e-jawin tanha

har murgh-e-KHush-alhan ab parwaz pe mail hai

gulshan mein na rah jae sayyaad kahin tanha

sajde dar-e-jaanan par lakhon ne kiye lekin

mear-e-wafa Thahri meri hi jabin tanha

ek husn-e-tasawwur hai jo zist ka sathi hai

wo koi bhi manzil ho hum log nahin tanha

nazdik 'hafiz' is ke rind aaen to kya aaen

jagir hai zahid ki sarmaya-e-den tanha