zulf lahra ke faza pahle moattar kar de
zulf lahrā ke fazā pahle mo.attar kar de
jaam phir āñkhoñ ke mai-ḳhāne se bhar bhar kar de
bujh ga.ī sham.a kī lau tere dupaTTe se to kyā
apnī muskān se mahfil ko munavvar kar de
hosh to uḌ ga.e āñkhoñ se hī pī kar saaqī
ab zarā vo bhī pilā de jo galā tar kar de
ġhair ko muñh na lagā hosh meñ huuñ jab tak maiñ
itnā ehsān mire sāqiyā mujh par kar de
be-muravvat haiñ baḌe pī ke bhī haiñ hosh meñ jo
aise mai-ḳhvāroñ ko mai-ḳhāne se bāhar kar de
sher meñ saath ravānī ke ma.ānī bhī to bhar
ai 'sadā' qaid tū kuuze meñ samundar kar de
zulf lahra ke faza pahle moattar kar de
jam phir aankhon ke mai-KHane se bhar bhar kar de
bujh gai shama ki lau tere dupaTTe se to kya
apni muskan se mahfil ko munawwar kar de
hosh to uD gae aankhon se hi pi kar saqi
ab zara wo bhi pila de jo gala tar kar de
ghair ko munh na laga hosh mein hun jab tak main
itna ehsan mere saqiya mujh par kar de
be-murawwat hain baDe pi ke bhi hain hosh mein jo
aise mai-KHwaron ko mai-KHane se bahar kar de
sher mein sath rawani ke maani bhi to bhar
ai 'sada' qaid tu kuze mein samundar kar de
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
