zindagi ka kis liye matam rahe

zindagī kā kis liye mātam rahe

mulk bastā hai miTe yā ham rahe

dil rahe piirī meñ bhī terā javāñ

āḳhirī dam tak yahī dam-ḳham rahe

chāhiye insān kā dil ho ġhanī

paas maal o zar bahut yā kam rahe

kyā isī jannat kī ye tahrīs hai

jis meñ kuchh din hazrat-e-ādam rahe

vasl se matlab na rakh tū ishq kā

dam bhare jā dam meñ jab tak dam rahe

laag ik din ban ke rahtī hai lagāv

haañ lagāvaT kuchh na kuchh bāham rahe

ishq ne jis dil pe qabza kar liyā

phir kahāñ us meñ nashāt o ġham rahe

sharq se jab nuur chamkā to kahāñ

barg-e-gul par qatra-e-shabnam rahe

husn kī duniyā kā hai daa.em shabāb

hashr tak us kā yahī aalam rahe

hai surūr-e-husn 'kaifī' lā-yazāl

dar-ḳhur-e-zarf us meñ besh o kam rahe

zindagi ka kis liye matam rahe

mulk basta hai miTe ya hum rahe

dil rahe piri mein bhi tera jawan

aaKHiri dam tak yahi dam-KHam rahe

chahiye insan ka dil ho ghani

pas mal o zar bahut ya kam rahe

kya isi jannat ki ye tahris hai

jis mein kuchh din hazrat-e-adam rahe

wasl se matlab na rakh tu ishq ka

dam bhare ja dam mein jab tak dam rahe

lag ek din ban ke rahti hai lagaw

han lagawaT kuchh na kuchh baham rahe

ishq ne jis dil pe qabza kar liya

phir kahan us mein nashat o gham rahe

sharq se jab nur chamka to kahan

barg-e-gul par qatra-e-shabnam rahe

husn ki duniya ka hai daem shabab

hashr tak us ka yahi aalam rahe

hai surur-e-husn 'kaifi' la-yazal

dar-KHur-e-zarf us mein besh o kam rahe