zinda rahne ka wo afsun-e-ajab yaad nahin

zinda rahne kā vo afsūn-e-ajab yaad nahīñ

maiñ vo insāñ huuñ jise nām-o-nasab yaad nahīñ

maiñ ḳhayāloñ ke parī-ḳhānoñ meñ lahrāyā huuñ

mujh ko bechārgī-e-mahfil-e-shab yaad nahīñ

ḳhvāhisheñ rasta dikhā detī haiñ varna yaaro

dil vo zarra hai jise shahr-e-talab yaad nahīñ

gard sī baaqī hai ab zehn ke ā.īne par

kaise ujḌā hai mirā shahr-e-tarab yaad nahīñ

tabsira aap ke andāz-e-karam par kyā ho

mujh ko ḳhud apnī tabāhī kā sabab yaad nahīñ

ḳhud farāmoshī ne taklīf kī shiddat kam kī

mujh ko kab yaad the ye zulm jo ab yaad nahīñ

mujh se pūchhā jo gayā jurm mirā mahshar meñ

dāvar-e-hashr se kah dūñgā ki ab yaad nahīñ

ijz ke saath chale aa.e haiñ ham 'yazdānī'

koī aur un ko manā lene kā Dhab yaad nahīñ

zinda rahne ka wo afsun-e-ajab yaad nahin

main wo insan hun jise nam-o-nasab yaad nahin

main KHayalon ke pari-KHanon mein lahraya hun

mujh ko bechaargi-e-mahfil-e-shab yaad nahin

KHwahishen rasta dikha deti hain warna yaro

dil wo zarra hai jise shahr-e-talab yaad nahin

gard si baqi hai ab zehn ke aaine par

kaise ujDa hai mera shahr-e-tarab yaad nahin

tabsira aap ke andaz-e-karam par kya ho

mujh ko KHud apni tabahi ka sabab yaad nahin

KHud faramoshi ne taklif ki shiddat kam ki

mujh ko kab yaad the ye zulm jo ab yaad nahin

mujh se puchha jo gaya jurm mera mahshar mein

dawar-e-hashr se kah dunga ki ab yaad nahin

ijz ke sath chale aae hain hum 'yazdani'

koi aur un ko mana lene ka Dhab yaad nahin