zamin roi hamare haal par aur aasman roya

zamīñ roī hamāre haal par aur āsmāñ royā

hamārī bekasī ko dekh kar saarā jahāñ royā

maiñ jab niklā chaman se shabnam āb-e-gulistāñ royā

udāsī chhā ga.ī aisī ḳhud āḳhir bāġhbāñ royā

na aayā rahm kuchh bhī aah dil meñ us sitamgar ke

hamārī jab.ha-sā.ī ke asar se āstāñ royā

har ik azv-e-badan mātam-kunāñ hai dil ke jaane se

huā yūsuf jo gum to kārvāñ kā kārvāñ royā

ḳhalal-afgan tirī bazm-e-tarab meñ kaun ho zālim

huā kyā gar tire kūche meñ koī tufta-e-jāñ royā

mire aañsū tirī bedād kā parda na kholeñge

abas ye bad-gumānī hai maiñ kab royā kahāñ royā

udū ḳhush hoñ to hoñ ai be-muravvat terī mahfil meñ

mirā to haal ye hai jab kabhī aayā yahāñ royā

jafā-e-dushmanāñ aur bevafā.ī-hā-e-yārāñ se

bahut ġham-dīda ho kar 'vahshat'-e-āzurda-jāñ royā

zamin roi hamare haal par aur aasman roya

hamari bekasi ko dekh kar sara jahan roya

main jab nikla chaman se shabnam aab-e-gulistan roya

udasi chha gai aisi KHud aaKHir baghban roya

na aaya rahm kuchh bhi aah dil mein us sitamgar ke

hamari jabha-sai ke asar se aastan roya

har ek azw-e-badan matam-kunan hai dil ke jaane se

hua yusuf jo gum to karwan ka karwan roya

KHalal-afgan teri bazm-e-tarab mein kaun ho zalim

hua kya gar tere kuche mein koi tufta-e-jaan roya

mere aansu teri bedad ka parda na kholenge

abas ye bad-gumani hai main kab roya kahan roya

udu KHush hon to hon ai be-murawwat teri mahfil mein

mera to haal ye hai jab kabhi aaya yahan roya

jafa-e-dushmanan aur bewafai-ha-e-yaran se

bahut gham-dida ho kar 'wahshat'-e-azurda-jaan roya