zabt ki had se guzar kar Khaar to hona hi tha

zabt kī had se guzar kar ḳhaar to honā hī thā

shiddat-e-ġham kā magar iz.hār to honā hī thā

aa.ine kab tak salāmat rahte shahr-e-sañg meñ

ek din patthar koī bedār to honā hī thā

ḳhaak meñ milnā hī thā ik din ġhurūr-e-zindagī

ret kī dīvār ko mismār to honā hī thā

kis tarah karte nazar-andāz apne aap ko

ik na ik din zindagī se pyaar to honā hī thā

koī āmāda na thā rāheñ badalne ke liye

rāsta millat kā phir dushvār to honā hī thā

jis taraf dekhā udhar apne hī the ḳhanjar-ba-kaf

phir mire īsār ko talvār to honā hī thā

ḳhvāhisheñ be-rabt thiiñ be-zauq thā dast-e-talab

aisī hājat kā sila inkār to honā hī thā

ek din kahnā hī thā ik dūsre ko alvidā.a

āḳhirash 'sālim' judā ik baar to honā hī thā

zabt ki had se guzar kar KHar to hona hi tha

shiddat-e-gham ka magar izhaar to hona hi tha

aaine kab tak salamat rahte shahr-e-sang mein

ek din patthar koi bedar to hona hi tha

KHak mein milna hi tha ek din ghurur-e-zindagi

ret ki diwar ko mismar to hona hi tha

kis tarah karte nazar-andaz apne aap ko

ek na ek din zindagi se pyar to hona hi tha

koi aamada na tha rahen badalne ke liye

rasta millat ka phir dushwar to hona hi tha

jis taraf dekha udhar apne hi the KHanjar-ba-kaf

phir mere isar ko talwar to hona hi tha

KHwahishen be-rabt thin be-zauq tha dast-e-talab

aisi hajat ka sila inkar to hona hi tha

ek din kahna hi tha ek dusre ko alwidaa

aaKHirash 'salim' juda ek bar to hona hi tha