wo shab-e-gham jo kam andheri thi

vo shab-e-ġham jo kam añdherī thī

vo bhī merī anā kī subkī thī

ġham mirī zindagī meñ TuuT girā

varna ye shor-dār naddī thī

din bhī shab-rañg ban ga.e apne

pahle sūraj se aañkh miltī thī

kyā maqālāt-e-āshiqī paḌhte

bazm meñ ham ne aah khīñchī thī

jal rahe the hare-bhare jañgal

aisī be-vaqt aag phailī thī

maiñ khaḌā thā ukhaḌte patthar par

vo usī tarah shānt lagtī thī

is liye be-karāñ meñ jā pahuñche

duur tak rahguzar añdherī thī

is liye shahr meñ rahe betāb

tāb-kārī havā meñ phailī thī

chand roz aur muntazir rahte

vaise mil kar bhī jaan denī thī

shab-e-ranj-o-mahan kā zikr na kar

us kī har ik ghaḌī nashīlī thī

ham bhī 'aslam' isī gumān meñ haiñ

ham ne bhī koī zindagī jī thī

wo shab-e-gham jo kam andheri thi

wo bhi meri ana ki subki thi

gham meri zindagi mein TuT gira

warna ye shor-dar naddi thi

din bhi shab-rang ban gae apne

pahle suraj se aankh milti thi

kya maqalat-e-ashiqi paDhte

bazm mein hum ne aah khinchi thi

jal rahe the hare-bhare jangal

aisi be-waqt aag phaili thi

main khaDa tha ukhaDte patthar par

wo usi tarah shant lagti thi

is liye be-karan mein ja pahunche

dur tak rahguzar andheri thi

is liye shahr mein rahe betab

tab-kari hawa mein phaili thi

chand roz aur muntazir rahte

waise mil kar bhi jaan deni thi

shab-e-ranj-o-mahan ka zikr na kar

us ki har ek ghaDi nashili thi

hum bhi 'aslam' isi guman mein hain

hum ne bhi koi zindagi ji thi