wo din bhi the ki in aankhon mein itni hairat thi

vo din bhī the ki in āñkhoñ meñ itnī hairat thī

tamām bāzīgaroñ ko mirī zarūrat thī

vo baat soch ke maiñ jis ko muddatoñ jiitā

bichhaḌte vaqt batāne kī kyā zarūrat thī

patā nahīñ ye tamannā-e-qurb kab jaagī

mujhe to sirf use sochne kī aadat thī

ḳhamoshiyoñ ne pareshāñ kiyā to hogā magar

pukārne kī yahī sirf ek sūrat thī

ga.e bhī jaan se aur koī mutma.in na huā

ki phir difā.a na karne kī ham pe tohmat thī

kahīñ pe chuuk rahe haiñ ye aa.ine shāyad

nahīñ to aks meñ ab tak mirī shabāhat thī

wo din bhi the ki in aankhon mein itni hairat thi

tamam bazigaron ko meri zarurat thi

wo baat soch ke main jis ko muddaton jita

bichhaDte waqt batane ki kya zarurat thi

pata nahin ye tamanna-e-qurb kab jagi

mujhe to sirf use sochne ki aadat thi

KHamoshiyon ne pareshan kiya to hoga magar

pukarne ki yahi sirf ek surat thi

gae bhi jaan se aur koi mutmain na hua

ki phir difaa na karne ki hum pe tohmat thi

kahin pe chuk rahe hain ye aaine shayad

nahin to aks mein ab tak meri shabahat thi