uThte hue tufan ka manzar nahin dekha

uThte hue tūfān kā manzar nahīñ dekhā

dekho mujhe gar tum ne samundar nahīñ dekhā

guzrā huā lamha thā ki bahtā huā dariyā

phir merī taraf us ne palaT kar nahīñ dekhā

ik dasht milā kūcha-e-jānāñ se nikal kar

ham ne to kabhī ishq ko be-ghar nahīñ dekhā

the sañg to betāb bahut naqsh-garī ko

ham ne hī unheñ aañkh uThā kar nahīñ dekhā

ik umr se hai jo mirī vahshat kā Thikāna

ḳhushiyoñ kī tarah tū ne bhī vo ghar nahīñ dekhā

nafrat bhī usī se hai parastish bhī usī kī

is dil sā koī ham ne to kāfar nahīñ dekhā

ḳhvāhish ko yahāñ hasb-e-zarūrat nahīñ paayā

hāsil ko yahāñ hasab-e-muqaddar nahīñ dekhā

har haal meñ dekhā hai use zabt kā paikar

'tishna' ko kabhī zarf se bāhar nahīñ dekhā

uThte hue tufan ka manzar nahin dekha

dekho mujhe gar tum ne samundar nahin dekha

guzra hua lamha tha ki bahta hua dariya

phir meri taraf us ne palaT kar nahin dekha

ek dasht mila kucha-e-jaanan se nikal kar

hum ne to kabhi ishq ko be-ghar nahin dekha

the sang to betab bahut naqsh-gari ko

hum ne hi unhen aankh uTha kar nahin dekha

ek umr se hai jo meri wahshat ka Thikana

KHushiyon ki tarah tu ne bhi wo ghar nahin dekha

nafrat bhi usi se hai parastish bhi usi ki

is dil sa koi hum ne to kafar nahin dekha

KHwahish ko yahan hasb-e-zarurat nahin paya

hasil ko yahan hasab-e-muqaddar nahin dekha

har haal mein dekha hai use zabt ka paikar

'tishna' ko kabhi zarf se bahar nahin dekha