uf kya maza mila sitam-e-rozgar mein

uf kyā mazā milā sitam-e-rozgār meñ

kyā tum chhupe the parda-e-lail-o-nahār meñ

sau sajde ek laġhzish-e-mastāna-vār meñ

allāh kyā adā hai tire bāda-ḳhvār meñ

rokūñ to mauj-e-ġham ko dil-e-be-qarār meñ

sāġhar chhalak na jaa.e kaf-e-rāsha-dār meñ

kis se ho phir umiid ki tār-e-nazar mirā

ḳhud jā ke mil gayā saf-e-mizhgān-e-yār meñ

ḳhud husn be-niyāz nahīñ faiz-e-ishq se

ḳhū mere dil kī hai nigah-e-be-qarār meñ

vo mast-e-nāz husn maiñ sarshār-e-ārzū

vo iḳhtiyār meñ haiñ na maiñ iḳhtiyār meñ

āshob-e-iztirāb meñ khaTkā jo hai to ye

ġham terā mil na jaa.e ġham-e-rozgār meñ

baaqī rahā na koī gila vaqt-e-vāpsīñ

kyā kah ga.e vo ik nigah-e-sharmsār meñ

ik mashq-e-iztirāb kā rakkhā hai naam 'ishq

uf bekasī ki vo bhī nahīñ iḳhtiyār meñ

bazm-e-suḳhan meñ aag lagā dī 'suhail' ne

kyā bijliyāñ thiiñ ḳhāma-e-jādū-nigār meñ

uf kya maza mila sitam-e-rozgar mein

kya tum chhupe the parda-e-lail-o-nahaar mein

sau sajde ek laghzish-e-mastana-war mein

allah kya ada hai tere baada-KHwar mein

rokun to mauj-e-gham ko dil-e-be-qarar mein

saghar chhalak na jae kaf-e-rasha-dar mein

kis se ho phir umid ki tar-e-nazar mera

KHud ja ke mil gaya saf-e-mizhgan-e-yar mein

KHud husn be-niyaz nahin faiz-e-ishq se

KHu mere dil ki hai nigah-e-be-qarar mein

wo mast-e-naz husn main sarshaar-e-arzu

wo iKHtiyar mein hain na main iKHtiyar mein

aashob-e-iztirab mein khaTka jo hai to ye

gham tera mil na jae gham-e-rozgar mein

baqi raha na koi gila waqt-e-wapsin

kya kah gae wo ek nigah-e-sharmsar mein

ek mashq-e-iztirab ka rakkha hai nam 'ishq

uf bekasi ki wo bhi nahin iKHtiyar mein

bazm-e-suKHan mein aag laga di 'suhail' ne

kya bijliyan thin KHama-e-jadu-nigar mein