uDi jo gard to is KHak-dan ko pahchana

uḌī jo gard to is ḳhāk-dāñ ko pahchānā

aur us ke ba.ad dil-e-be-nishāñ ko pahchānā

jalā jo rizq to ham āsmāñ ko jaan ga.e

lagī jo pyaas to tiir o kamāñ ko pahchānā

chalo ye aañkh kā jal-thal to tum ne dekh liyā

magar ye kyā ki na abr-e-ravāñ ko pahchānā

bahār aa.ī to har-sū thiiñ katraneñ us kī

bahār aa.ī to ham ne ḳhizāñ ko pahchānā

ḳhud apne ġham hī se kī pahle dostī ham ne

aur us ke ba.ad ġham-e-dostāñ ko pahchānā

safar tavīl sahī hāsil-e-safar ye hai

vahāñ ko bhuul ga.e aur yahāñ ko pahchānā

zamīñ se haath chhuḌāyā to fāsle jaage

magar na ham ne karāñ-tā-karāñ ko pahchānā

ajab tarah se guzārī hai zindagī ham ne

jahāñ meñ rah ke na kār-e-jahāñ ko pahchānā

uDi jo gard to is KHak-dan ko pahchana

aur us ke baad dil-e-be-nishan ko pahchana

jala jo rizq to hum aasman ko jaan gae

lagi jo pyas to tir o kaman ko pahchana

chalo ye aankh ka jal-thal to tum ne dekh liya

magar ye kya ki na abr-e-rawan ko pahchana

bahaar aai to har-su thin katranen us ki

bahaar aai to hum ne KHizan ko pahchana

KHud apne gham hi se ki pahle dosti hum ne

aur us ke baad gham-e-dostan ko pahchana

safar tawil sahi hasil-e-safar ye hai

wahan ko bhul gae aur yahan ko pahchana

zamin se hath chhuDaya to fasle jage

magar na hum ne karan-ta-karan ko pahchana

ajab tarah se guzari hai zindagi hum ne

jahan mein rah ke na kar-e-jahan ko pahchana