tum intizar ke lamhe shumar mat karna

tum intizār ke lamhe shumār mat karnā

diye jalā.e na rakhnā siñgār mat karnā

mirī zabān ke mausam badalte rahte haiñ

maiñ aadmī huuñ mirā e'tibār mat karnā

kiran se bhī hai ziyāda zarā mirī raftār

nahīñ hai aañkh se mumkin shikār mat karnā

tumheñ ḳhabar hai ki tāqat mirā vasīla hai

tum apne aap ko be-iḳhtiyār mat karnā

tumhāre saath mire muḳhtalif marāsim haiñ

mirī vafā pe kabhī inhisār mat karnā

tumheñ batā.ūñ ye duniyā ġharaz kī duniyā hai

ḳhulūs dil meñ agar hai to pyaar mat karnā

mileñge raah meñ 'āsim' ko ham-safar ka.ī aur

vo aa rahā hai magar intizār mat karnā

tum intizar ke lamhe shumar mat karna

diye jalae na rakhna singar mat karna

meri zaban ke mausam badalte rahte hain

main aadmi hun mera e'tibar mat karna

kiran se bhi hai ziyaada zara meri raftar

nahin hai aankh se mumkin shikar mat karna

tumhein KHabar hai ki taqat mera wasila hai

tum apne aap ko be-iKHtiyar mat karna

tumhaare sath mere muKHtalif marasim hain

meri wafa pe kabhi inhisar mat karna

tumhein bataun ye duniya gharaz ki duniya hai

KHulus dil mein agar hai to pyar mat karna

milenge rah mein 'asim' ko ham-safar kai aur

wo aa raha hai magar intizar mat karna