thakna bhi lazmi tha kuchh kaam karte karte

thaknā bhī lāzmī thā kuchh kaam karte karte

kuchh aur thak gayā huuñ ārām karte karte

andar sab aa gayā hai bāhar kā bhī añdherā

ḳhud raat ho gayā huuñ maiñ shaam karte karte

ye umr thī hī aisī jaisī guzār dī hai

badnām hote hote badnām karte karte

phañstā nahīñ parinda hai bhī isī fazā meñ

tañg aa gayā huuñ dil ko yuuñ daam karte karte

kuchh be-ḳhabar nahīñ the jo jānte haiñ mujh ko

maiñ kuuch kar rahā thā bisrām karte karte

sar se guzar gayā hai paanī to zor kartā

sab rok rukte rukte sab thaam karte karte

kis ke tavāf meñ the aur ye din aa ga.e haiñ

kyā ḳhaak thī ki jis ko ehrām karte karte

jis moḌ se chale the pahuñche haiñ phir vahīñ par

ik rā.egāñ safar ko anjām karte karte

āḳhir 'zafar' huā huuñ manzar se ḳhud hī ġhā.eb

uslūb-e-ḳhās apnā maiñ aam karte karte

thakna bhi lazmi tha kuchh kaam karte karte

kuchh aur thak gaya hun aaram karte karte

andar sab aa gaya hai bahar ka bhi andhera

KHud raat ho gaya hun main sham karte karte

ye umr thi hi aisi jaisi guzar di hai

badnam hote hote badnam karte karte

phansta nahin parinda hai bhi isi faza mein

tang aa gaya hun dil ko yun dam karte karte

kuchh be-KHabar nahin the jo jaante hain mujh ko

main kuch kar raha tha bisram karte karte

sar se guzar gaya hai pani to zor karta

sab rok rukte rukte sab tham karte karte

kis ke tawaf mein the aur ye din aa gae hain

kya KHak thi ki jis ko ehram karte karte

jis moD se chale the pahunche hain phir wahin par

ek raegan safar ko anjam karte karte

aaKHir 'zafar' hua hun manzar se KHud hi ghaeb

uslub-e-KHas apna main aam karte karte