taqdir jab muawin-e-tadbir ho gai

taqdīr jab muāvin-e-tadbīr ho ga.ī

miTTī pe kī nigāh to iksīr ho ga.ī

dil jaañ nisār-e-mai hai zabāñ tā.ib-e-sharāb

is kashmakash meñ ruuh kī tāzīr ho ga.ī

chhīñTeñ jo ḳhuuñ kī dāman-e-qātil meñ rah ga.iiñ

mahshar meñ mere qalb kī tafsīr ho ga.ī

yā qatl kījiye mujhe yā baḳhsh dījiye

ab ho ga.ī huzūr jo taqsīr ho ga.ī

shabnam oḌhī guloñ se mirā naqsha khiñch gayā

murjhā ga.ī kalī mirī tasvīr ho ga.ī

zindāniyān-e-kākul-e-hastī kidhar ko jaa.eñ

ik zulf sab ke paañv kī zanjīr ho ga.ī

maiñ kah chalā thā dāvar-e-mahshar se hāl-e-dil

ik surmagīñ nigāh gulū-gīr ho ga.ī

bas tham gayā safīr-e-amal kah ke yā nasīb

jis jā pe ḳhatm manzil-e-tadbīr ho ga.ī

toḌā hai dam abhī abhī bīmār-e-hijr ne

aa.e magar huzūr ko tāḳhīr ho ga.ī

jab apne aap par hameñ qaabū milā 'ravāñ'

āsān rāz-e-dahr kī tafsīr ho ga.ī

taqdir jab muawin-e-tadbir ho gai

miTTi pe ki nigah to iksir ho gai

dil jaan nisar-e-mai hai zaban taib-e-sharab

is kashmakash mein ruh ki tazir ho gai

chhinTen jo KHun ki daman-e-qatil mein rah gain

mahshar mein mere qalb ki tafsir ho gai

ya qatl kijiye mujhe ya baKHsh dijiye

ab ho gai huzur jo taqsir ho gai

shabnam oDhi gulon se mera naqsha khinch gaya

murjha gai kali meri taswir ho gai

zindaniyan-e-kakul-e-hasti kidhar ko jaen

ek zulf sab ke panw ki zanjir ho gai

main kah chala tha dawar-e-mahshar se haal-e-dil

ek surmagin nigah gulu-gir ho gai

bas tham gaya safir-e-amal kah ke ya nasib

jis ja pe KHatm manzil-e-tadbir ho gai

toDa hai dam abhi abhi bimar-e-hijr ne

aae magar huzur ko taKHir ho gai

jab apne aap par hamein qabu mila 'rawan'

aasan raaz-e-dahr ki tafsir ho gai